Nafta, pranë 84 USD për fuçi – Investitorët presin takimin e OPEC+ dhe embargon e BE ndaj naftës ruse
Nafta i është rikthyer fitimeve në sesionin e sotëm europian, pas humbjeve të realizuara në tregtinë amerikane dhe atë aziatike. Në sesionin e kaluar, nafta u gjend nën presion nga të dhënat e publikuara në SHBA, që treguan një rënie të rezervave. Në fokus të tregjeve do të jetë edhe takimi i OPEC+ më 4 dhjetor, ku do të përcaktohen politikat e prodhimit për muajt në vijim. Nafta Brent e Londrës po tregtohet në rreth 84 dollarë për fuçi, ndërsa nafta Bruto amerikane po tregtohet në rreth 79 dollarë për fuçi.
Referuar të dhënave jozyrtare në SHBA, rezervat e naftës bruto ranë me 7.9 milionë fuçi gjatë javës që u mbyll më 25 nentor, njoftoi Instituti Amerikan i Naftës. Megjithatë, tregjet po presin të dhënat zyrtare që publikohen më vonë gjatë ditës së sotme nga Administrata për Informimin mbi Energjinë. Përsa i përket takimit të OPEC+, analistët parashikojnë se karteli mund ta mbajë prodhimin e pandryshuar, duke hedhur poshtë raportimet e mediave për një rritje të kuotave.
Takimi i OPEC+ vjen në një kohë që kërkesa është dëmtuar ndjeshëm për shkak të rritjes së infektimeve me Covid-19 në Kinë, ndërsa Bashkimi Europian pritet të zbatojë embargon e plotë ndaj naftës ruse duke filluar nga 5 dhjetori. Agjencia Ndërkombëtare e Energjisë parashikon se prodhimi i naftës bruto në Rusi do të bjerë me rreth 2 milionë fuçi naftë në ditë, deri në fund të tremujorit të parë të vitit 2023.
SCAN
Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.