Ndërron jetë në moshën 86 vjeçare Berlusconi – Ish kryeministri italian vuante nga leuçemia prej disa kohësh

Ndërron jetë në moshën 86 vjeçare, ish-kryeministri, drejtuesi i Forza Italia dhe themeluesi i Mediaset Silvio Berlusconi.

Berlusconi ka ndërruar jetë në spitalin San Raffaele në Milano njofton Corriere Della Sera.

Berlusconi u kthye në San Raffaele të premten e kaluar, pas një shtrimi të gjatë prej 45 ditësh, i cili përfundoi disa javë më parë, për shkak të pneumonisë dhe leuçemisë mielomonocitare.

Në mëngjes, vëllai i tij Paolo dhe fëmijët e tij kishin shkuar me urgjencë në spital, ku tashmë ndodhej Marta Fascina.

Manjati i medias, i cili udhëhoqi tre qeveri italiane midis 1994 dhe 2011 dhe partia e të cilit Forza Italia është në koalicionin aktual qeverisës, vuante nga leuçemia për disa kohë.

Berlusconi ishte një nga politikanët më të shquar të Italisë, duke bërë një rikthim politik në vitin 2017, pavarësisht nga një karrierë e njollosur nga skandalet seksuale, akuzat e panumërta për korrupsion dhe një dënim për mashtrim tatimor.

SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.