Nga gjimnazi, në shkollë profesionale – Rama: Nga dhjetori do të jetë e mundur nëpërmjet e-Albania

Shumë sektorë të ekonomisë nga viti në vit po vuajnë nga mungesa e fuqisë punëtore e kualifikuar, ose siç njihen ndryshe zanatçinj. Ndonëse janë krijuar disa lehtësi për të ndjekur arsimin profesional, një pjesë e mirë e të rinjve nuk e preferojnë këtë alternative. Të dhënat e fundit zyrtare flasin për rreth 4 mijë vende të lira. Sipas kryeministrit Edi Rama, brenda muajit dhjetor, nxënësit e viteve të para të gjimnazeve, mund të transferohen lehtësisht në shkollat e arsimit profesional, nëpërmjet e-Albania. Ai shtoi se, arsimi profesional dhe tërheqja e të rinjve në përzgjedhjen e tij, si një rrugë alternative e sigurtë për ta, për t’u integruar në tregun e punës, vijon të mbetet një nga objektivat e qeverisë në fushën e arsimit.

“Nëse sot ne kemi rreth 4000 vende të lira në sistemin e arsimit profesional, pra, potencial për thithur 4000 nxënës, ne duhet të thithim 4000 nxënës. Pastaj, nevojat janë për shumë më tepër ama nuk mund t’ju themi juve që “Shtyni shumë më tepër” sepse do na duhet që të kemi infrastrukturën për të pranuar shumë më tepër. Me infrastrukturën ekzistuese, ne kemi 4000 mundësi aty për nxënësit e shkollave 9 vjeçare dhe të përgjithshme. Kjo kërkon, natyrisht, një aktivizim të shpejtë dhe një aktivizim sistematik, por kërkon dhe një integrim të plotë të punës të drejtorive arsimore me shkollat e arsimit profesional. Vërtetë janë shkolla me varësi të ndryshme, por nuk ka asnjë problem, duhet të funksionojë si një sistem”, u shpreh Rama.

Në këtë kontekst, kryeministri theksoi se kurrikulat, stafet e të tjerë mund të jenë të ndryshme, por sistemi është i njëjti dhe drejtoritë rajonale duhet t’i konsiderojnë shkollat profesionale si pjesë të tyre dhe ministrja do të përgatisë një dokument ligjor, zyrtar të qeverisë ku kjo do jetë edhe e formalizuar, pra, varësia e dyfishtë e shkollave të arsimit profesional.

Dorian Koça / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.