Ngadalësimi i Eurozonës rrëzon euron – Shtohen mundësitë për një recesion në tremujorin e tretë

Dollari amerikan është rritur lehtë në sesionin e sotëm, ndërsa një ditë më parë preku nivelin më të ulët në një muaj, si pasojë e rritjes së yield-it të obligacioneve në SHBA. Në anën tjetër, euro është gjendur nën presion për shkak se të dhënat ekonomike në Eurozonë treguan një ngadalësim të aktivitetit të biznesit, duke sugjeruar se blloku mund të bjerë në recesion.

Megjithatë, euro po qëndron në mbi 1.06 dollarë. Rënia e euros ka mbështetur indeksin që mat ecurinë e dollarit amerikan, përballë shportës me 6 monedhat kryesore ndërkombëtare, i cili po qëndron në rreth 106, pasi regjistroi një ditë më parë nivelin më të ulët që nga 22 shtatori prej 105.3. Analistët shprehen se, dobësia e ekonomisë së Eurozonës dhe Gjermanisë në krahasim me Shtetet e Bashkuara ka të ngjarë të kufizojë çdo rënie të dollarit.

Të dhënat e produktit të brendshëm bruto në SHBA do të publikohen të enjten, ndërsa të premten do të publikohet raporti mbi inflacionin, që mund të shkaktojnë më shumë luhatje në yield-et e obligacioneve dhe në tregjet e monedhave.

Ndërkohë, edhe franga zvicerane po qëndron në rënie të lehtë përballë dollarit, për shkak të largimit të shqetësimeve për përshkallëzimin e konfliktit mes Izraelit dhe Hamasit. Monedha zvicerane, e parë tradicionalisht si një aset i sigurtë, është rritur ditët e fundit pas shpërthimit të luftës në Lindjen e Mesme.

Edhe paundi është dobësuar lehtë, pasi të dhënat e publikuara sot treguan se tregu i punës në Mbretërinë e Bashkuar u ngadalësua në periudhën qershor-gusht. Banka e Anglisë do të vendosë mbi normat e interesit të enjten e javës së ardhshme, pas vendimit të Rezervës Federale të mërkurën. Ndërkohë, takimi i Bankës Qendrore Evropiane përfundon këtë të enjte, me tregtarët që presin që të treja bankat qendrore të mbajnë normat e interesit të pandryshuara.

SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.