Nafta, e qëndrueshme pranë 90 USD – Vijojnë përpjekjet diplomatike për t’i dhënë fund luftës
Tregu i naftës po ndryshon minimalisht në sesionin e sotëm, pas humbjeve të mëdha që realizoi një ditë më parë. Megjithatë, tregu po gjen një mbështetje nga situata e tensionuar në Lindjen e Mesme, për shkak të frikës se lufta mes Izraelit dhe Hamasit mund të përhapet edhe në vendet e tjera të rajonit të pasur me naftë.
Nafta Brent e Londrës po tregtohet pranë 90 dollarëve për fuçi, ndërsa nafta Bruto amerikane po tregtohet në rreth 86 dollarë për fuçi. Të dy bençmarkët ranë me rreth 2% në sesionin e kaluar, pasi përpjekjet diplomatike në Lindjen e Mesme, rajoni më i madh i furnizimit me naftë në botë, u intensifikuan për të frenuar konfliktin midis Izraelit dhe Hamasit, duke lehtësuar shqetësimet e investitorëve për ndërprerjen e furnizimit.
Hamasi njoftoi të hënën se kishte liruar dy gra izraelite që ishin në mesin e më shumë se 200 pengjeve, ndërsa Shtetet e Bashkuara e kishin këshilluar Izraelin të ndalonte sulmin tokësor në Rripin e Gazës. Analistët prashikojnë se nafta Brent do të luhatet mes 80 dhe 90 dollarëve për fuçi, por gjithçka do të varet nga rrjedha që do të marrin zhvillimet në Lindjen e Mesme.
Investitorët po presin edhe të dhënat mbi rezervat e naftës në SHBA për javën e kaluar, ku parashikohet një rritje e tyre, sipas një sondazhi të Reuters. Të martën publikohet raporti jo zyrtar nga Instituti Amerikan i Naftës, ndërsa të mërkurën publikohet raporti zyrtar nga Administrata për Informimin mbi Energjinë.
SCAN
Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.