Ngadalësohet ekonomia globale – Sipas OKB, arsyet janë normat e larta të interesit, ulja e shpenzimeve konsumatore

Rritja ekonomike globale parashikohet të ngadalësohet nga 2.7 % në 2023-shin, në 2.4% në 2024-ën, sipas raportit të OKB-së për Situatë dhe Perspektivat Ekonomike Botërore 2024. Dobësimi i tregtisë globale, kostot e larta të huamarrjes, rritja e borxhit publik, investimet vazhdimisht të ulëta dhe rritja e tensioneve gjeopolitike vënë në rrezik rritjen globale, thuhet në raport.

Rritja në shumë ekonomi të zhvilluara, veçanërisht në Shtetet e Bashkuara të Amerikës, parashikohet të ngadalësohet në vitin 2024 duke pasur parasysh normat e larta të interesit, ngadalësimin e shpenzimeve konsumatore dhe tregjet më të dobëta të punës.

Perspektivat afatshkurtra të rritjes për shumë vende në zhvillim, veçanërisht në Azinë Lindore, Azinë Perëndimore dhe Amerikën Latine dhe Karaibe, po përkeqësohen gjithashtu për shkak të kushteve më të shtrënguara financiare, zvogëlimit të hapësirës fiskale dhe kërkesës së jashtme të ngadaltë.

Ekonomitë me të ardhura të ulëta dhe të cenueshme po përballen me presione në rritje të bilancit të pagesave dhe rreziqe të qëndrueshmërisë së borxhit. Perspektivat ekonomike për shtetet në zhvillim të ishujve të vegjël, në veçanti, do të kufizohen nga ngarkesat e mëdha të borxhit, normat e larta të interesit dhe dobësitë në rritje të lidhura me klimën, sipas raportit.

Ky parashikim i fundit erdhi pas performancës ekonomike globale që tejkaloi pritshmëritë në vitin 2023. Megjithatë, rritja më e fortë se sa pritej e vitit të kaluar maskoi rreziqet afatshkurtra dhe dobësitë strukturore, sipas raportit. Inflacioni global parashikohet të bjerë më tej, nga rreth 5.7 % në 2023-shin në 3.9% në 2024-ën. Presionet e çmimeve janë, megjithatë, ende të larta në shumë vende dhe çdo përshkallëzim i mëtejshëm i konflikteve gjeopolitike rrezikon rritje të përtërirë të inflacionit, paralajmëron raporti.

Në rreth një të katërtën e të gjitha vendeve në zhvillim, inflacioni vjetor parashikohet të kalojë 10 % në vitin 2024. Që nga janari 2021, çmimet e konsumit në ekonomitë në zhvillim janë rritur me 21.1% kumulative, duke gërryer ndjeshëm fitimet ekonomike të arritura pas rimëkëmbjes së COVID-19. Mes ndërprerjeve nga ana e ofertës, konflikteve dhe ngjarjeve ekstreme të motit, inflacioni lokal i çmimeve të ushqimeve mbeti i lartë në shumë ekonomi në zhvillim, duke prekur në mënyrë disproporcionale familjet më të varfra, përfundon raporti.

Dorina Kurtaj / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.