Një në dy italianë ulin shpenzimet ushqimore – Dëmi për ekonominë e vendit si pasojë e inflacionit të lartë llogaritet 575 miliardë euro

Me rritjen e inflacionit dhe faturave të energjisë, më shumë se një në dy italianë (51%) ka ulur blerjet e produkteve agroushqimore. Zinxhiri që nga fusha në tavolinë vlen 575 miliardë euro, gati një e katërta e PBB-së së Italisë dhe përfshin ndër të tjera 4 milionë persona të punësuar në 740 mijë ferma, 70 mijë në industrinë ushqimore, mbi 330 mijë objekte hotelerie dhe 230 mijë pika të shitjes me pakicë. Ky është alarmi që ka ngritur presidenti i Coldiretti, Ettore Prandini.

Sipas rezultateve të sondazhit të kryer nga shoqata që grupon rreth 1 milion e gjysëm sipërmarrës agroushqimore në Itali, 18% e konsumatorëve, për shkak të inflacionit deklarojnë se kanë ulur cilësinë e blerjeve të tyre, duke shkuar drejt produkteve me kosto të ulët, ndërsa vetëm 1/3 (31%) nuk kanë ndryshuar shpenzimet e tyre.

Sipas Coldiretti, italianët janë në kërkim të çmimeve më të ulëta duke shkuar sa një njërin dyqan në tjetrin në kërkim të promocioneve për produkte të ndryshme.

Nëse çmimet për familjet vijojnë të shtrenjtohen, kjo prek rëndë zinxhirin agroushqimor të shtrirë në të gjithë territorin që furnizon çdo ditë tavolinat e konsumatorëve. Në fshatrat italiane, raporton Coldiretti, deri në 1/3 e fermave po punojnë me humbje për shkak të rritjes së kostos, të cilat variojnë nga shtrenjtimi 250% për plehrat bujqësore, në 95% për lëndën e parë për bagëtinë, 110% për naftën dhe një shtrenjtim prej 500% për ujitjen e të mbjellave. Rezultati është një rritje mesatare prej mbi 17 mijë euro për kompani. Në rrezik janë edhe 5450 produkte tradicionale agroushqimore.

SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.