‘Një turp që e bën Europën më të dobët’: Eurodeputetët të tronditur nga skandali i korrupsionit i Katarit!

Arrestimi dhe akuzimi i katër personave në lidhje me një hetim kundër korrupsionit që përfshin anëtarë të Parlamentit Europian dhe një shtet të Gjirit, që thuhet se është Katari, mund të tronditë Brukselin në thelbin e tij.

Disa eurodeputetë, përfshirë nën-presidenten Eva Kaili, janë akuzuar se kanë pranuar shuma të mëdha parash nga një vend i Gjirit që raportohet se është mikpritës i Kupës së Botës, Katari. Doha i ka mohuar akuzat.

Bashkë-presidenti i grupit të të Gjelbërve, Philippe Lamberts, bëri thirrje për një hetim parlamentar dhe që çështja e korrupsionit të ngrihet këtë javë në seancën plenare të asamblesë së fundit të vitit të BE-së.

Ligjvënësi i BE-së do të nisë të hënën në atë që premton të jetë një seancë e zjarrtë. Ai do të votojë këtë javë për një propozim për të zgjatur udhëtimin pa viza në BE për Kuvajtin, Katarin, Omanin dhe Ekuadorin. Disa ligjvënës kanë sugjeruar se debati dhe votimi duhet të shtyhet.

Disa ekspertë kanë argumentuar në dritën e skandalit se BE-ja tani duhet të forcojë legjislacionin e saj kundër korrupsionit. Para se të shpërthejë skandali, asambleja po shqyrtonte hyrjen pa viza në zonën Shengen për qytetarët e Katarit.

Por Partia Popullore Europiane, Social Demokratët, Liberalët dhe të Gjelbërit kanë bërë thirrje që atëherë për pezullimin e votimit të asamblesë për këtë çështje.

Akuzat vijnë në një kohë të ndjeshme për Katarin, pasi ai pret Kupën e Botës. Shtetit të Gjirit tashmë i është dashur të luftojë kundër pretendimeve rreth abuzimeve të dyshuara të të drejtave të njeriut të punëtorëve emigrantë dhe komunitetit LGBT+.

Edel Strazimiri / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.