Nxitje për qytetarët në fondet private të pensioneve – Çfarë parashikojnë ndryshimet ligjore që synojnë të rrisin interesin?

Skemat e pensioneve private ende nuk po arrin të depërtojnë mjaftueshëm tek qytetarët shqiptarë, pasi pjesëmarrja është e ulët.  Gjatë prezantimit të projektligjit “Për Fondet e Pensionit Privat” në Komisionin e Ekonomisë dhe Financave, kreu i Autoritetit të Mbikëqyrjes Financiare, Ervin Mete, tha se  janë bërë disa rregullime ligjore që synojnë nxitjen e kësaj skeme duke ulur tarifat në rastet kur fondi tërhiqet me këste.

Zv.ministrja e financave  Olta Manjani u shpreh se parashikohet që të ketë një rritje të interesit të qytetarëve shqiptarëve  në fondet e pensioneve private, krahas sigurimit të detyrueshëm.

Por ndërsa synohet të nxitet pjesëmarrja në fondet private të pensioneve, skema e detyrueshme e kontributeve shoqërore vijon të jetë deficitare dhe kërkon një subvencion afro 28 miliardë lekë në vit.

Sipas statistikave zyrtare të AMF, numri i anëtarëve në fondet e pensioneve, është 36.500 mijë individë. Kjo skemë jep mundësi në moshën e pensionit, këta individë të kenë të ardhura më dinjitoze.

Elisabeta Dosku/ SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.