Papunësia gjermane arrin në shkallën më të lartë në më shumë se dy vjet!

Papunësia e Gjermanisë arriti në 5.9% në nëntor, nga 5.8% e tetorit, sipas shifrave të fundit të Zyrës Federale të Punës. Kjo është norma më e lartë që nga maji 2021.

Raporti tregon se numri i personave të papunë u rrit me 22,000 në terma të rregulluar sezonalisht në 2,702 milionë.

Një vështrim më i afërt i të dhënave rajonale tregon se Bremen dhe Berlini kanë normat më të larta të papunësisë, Bayern dhe Baden-Württemberg vazhdojnë të ruajnë normat më të ulëta.

“Rënia ekonomike vazhdon të lërë gjurmë në tregun gjerman të punës”, tha Andrea Nahles, kryetare e Agjencisë Federale të Punësimit.

Në nëntor, kishte 733,000 vende pune, 90,000 më pak se një vit më parë, tha Zyra Federale e Punës.

“Punësimi është vetëm në rritje të lehtë dhe kërkesa për punë është ende në rënie,” tha Nahles.

Gatishmëria e kompanive në Gjermani për të punësuar staf të ri u ul pak në nëntor, tregoi të martën barometri i punësimit Ifo.

“Me një themel të fortë për rimëkëmbje ende të padukshme, kompanitë po shtyjnë punësimin e stafit të ri,” tha Klaus Wohlrabe, kreu i sondazheve në Ifo.

Ekonomia gjermane po përpiqet të rimëkëmbet, PBB-ja u tkurr në tremujorin e tretë të vitit dhe ekonomia e përgjithshme ka shenja të një recesioni të afërt.

Edel Strazimiri / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.