Paralajmërimi kundër cilësimit të “krizës energjetike” – Vendet e BE kërkojnë që tregu i energjisë të mos vlerësohet si në gjendje kritike
Danimarka, Gjermania, Holanda, Estonia, Finlanda, Luksemburgu dhe Letonia kanë paralajmëruar Brukselin që të mos nxitojë duke bërë ndryshime të mëdha në tregun e energjisë elektrike të Bashkimit Europian si reagim ndaj krizës energjetike, duke bërë thirrje për rregullime të kufizuara të sistemit.
Komisioni Europian aktualisht po harton një rinovim të rregullave të tregut të energjisë elektrike të BE-së, me synimin për të zbutur dhe më shumë faturat e konsumatorëve nga rritja e çmimeve të karburanteve fosile dhe për të shmangur një përsëritje të rritjes sëcmimit të energjisë elektrike të shkaktuar vitin e kaluar nga reduktimet në furnizimin me gaz rus.
Shtatë vendet, të udhëhequra nga Danimarka, theksuan në një letër, se projekti ekzistues i tregut të Europës ka nxitur çmime më të ulëta të energjisë elektrike që kanë zgjatur prej vitesh, ka ndihmuar në zgjerimin e energjisë së rinovueshme dhe ka siguruar që të prodhohet energji e mjaftueshme për të përmbushur kërkesën si dhe për të shmangur mungesat. Minsitri danez i energjisë u shprej se i duhet rezistuar tundimit për të shkatërruar tregun energjetik dhe atë që ai ka qenë prej vitesh.
Vendet këmbëngulin se ka hapësirë për përmirësim, veçanërisht në dritën e rritjes së kostove të energjisë vitin e kaluar. Por çdo ndryshim duhet të sigurojë që tregu të funksionojë ende dhe të nxisë investime masive në energjinë e rinovueshme. Në letrën drejtuar Komisionit Europian dhe të analizuar nga Reuters, thuhej ndër të tjera se çdo reformë që shkon përtej rregullimeve të synuara në kuadrin ekzistues duhet të mbështetet nga një vlerësim i thelluar i ndikimit dhe nuk duhet të miratohet në gjendje krize.
Vende të tjera, duke përfshirë Spanjën dhe Francën, po kërkojnë reforma më të thella. Spanja ka propozuar një zhvendosje drejt kontratave më afatgjata, me çmim fiks për termocentralet, në përpjekje për të kufizuar rritjen e çmimeve. Të shtatë vendet thanë në letrën e tyre se skemat për ta bërë këtë mund të luajnë një rol, por ato duhet të jenë vullnetare, të fokusohen në gjenerimin e burimeve të rinovueshme dhe të “reagojnë” akoma ndaj tregut.
Në letrën e tyre, shtatë vendet mbështetën një ide të hedhur tashmë nga Komisioni për ta bërë më të lehtë për konsumatorët të zgjedhin midis kontratave të energjisë me çmim të ndryshueshëm dhe atij me çmim fiks. Por ata kundërshtuan një tjetër sugjerim të Komisionit për të zgjatur një masë të përkohshme të BE-së, e cila mbron të ardhurat e papritura nga gjeneruesit që nuk përfitojnë nga gazi.
Dorina Kurtaj / SCAN
Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.