Parisi përgatitet për Lojërat Olimpike – Franca kërkon të nxisë ekonominë e saj, por “fatura” e evenimentit është e lartë

Organizimi i Lojërave Olimpike është një akt balancues, pasi ‘fatura’ për vendet pritëse është jashtëzakonisht e lartë, por përfitimet ekonomike nga tërheqja e turizmit ka të ngjarë të mbizotërojnë.Franca e ka marrë përsipër këtë gjë me presidentin Emmanuel Macron që dëshiron ta kthejë ngjarjen në një festë ndërkombëtare. Biletat për ceremoninë e hapjes fillojnë nga 2.700 euro dhe çdo ndeshje kushton të paktën disa qindra euro, por faturat e turizmit mund të ofrojnë një nxitje shumë të nevojshme për ekonominë franceze.

Bazuar në shifrat e ngjarjeve të kaluara, barra financiare është e lartë, veçanërisht për shkak të objekteve të specializuara, disa prej të cilave kanë përdorim të kufizuar pas Lojërave.

Në fakt, sipas hulumtimeve të ekspertëve nga Universiteti i Lozanës, deficiti nga organizimi i Lojërave Olimpike ka arritur deri në 5.7 miliardë dollarë në Montreal për Lojërat Verore 1976. Për Athinën, për shembull, deficiti vlerësohet në 4.3 miliardë dollarë, ndërsa vlera totale e ngjarjes arriti në 18.7 miliardë dollarë. Anketa të tjera që janë përgatitur në vitet e fundit mund të llogaritin shuma paksa të ndryshme. Megjithatë, rezultati është se kostot dekurajojnë vendet që të aplikojnë. Tokio shpenzoi deri në 150 milionë dollarë për ofertën e dështuar të vitit 2016 dhe rreth gjysmën e tyre për ofertën e suksesshme të 2020-ës. Toronto ka vendosur se nuk mund të sigurojë 60 milionë dollarët e kërkuara për ofertën e 2024ës.

Disa ekspertë ia atribuojnë problemin pjesërisht qasjes së Komitetit Olimpik Ndërkombëtar, i cili zgjedh midis aplikantëve dhe vendos kushte për infrastrukturën ose çmimet e biletave, të cilat vendet pritëse duhet t’i respektojnë dhe paguajnë. IOC mban një barrë të kufizuar financiare të ngjarjes, ndërkohë që gëzon të ardhura të konsiderueshme nga të drejtat ekskluzive të transmetimit.

Megjithatë, Lojërat Olimpike mund të kenë një efekt pozitiv në zhvillimin ekonomik dhe punësimin. Në Paris këtë vit do të hapen 181.000 vende pune. Natyrisht, në këtë shifër përfshihen edhe pozitat ekzistuese, pagat e të cilëve pritet të mbeten të qëndrueshme, pavarësisht rritjes së lëvizshmërisë.

Gjithashtu, Lojërat Olimpike mbështeten gjithmonë shumë te vullnetarët, të cilët janë të papaguar. Edhe pse si vullnetar mund të marrësh pjesë falas në disa evente, kostoja e jetesës në Paris këtë verë do të jetë frenuese. Për shembull, bileta e metrosë do të rritet përkohësisht në 4 euro për shkak të rritjes së flukseve turistike.

Dorina Kurtaj / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.