Powell mbështet dollarin amerikan – Sinjalizon rritjen e normave të interesit me hap më të shpejtë

Dollari amerikan është forcuar ndjeshëm gjatë sesionit të sotëm, pasi presidenti i Rezervës Federale, Jerome Powell deklaroi se banka qendrore amerikane do të rrisë normat e interesit me një hap më të shpejtë se parashikimet e tregjeve. Gjithashtu, Powell sinjalizoi se procesi i kthimit të inflacionit pranë objektivit prej 2% do të kërkojë më shumë kohë. “Rezerva Federale është e përgatitur të marrë hapa domethënës, nëse informacionet sugjerojnë se nevojiten masa më të ashpra për të kontrolluar çmimet”, deklaroi Powell, në dëshminë e tij përpara ligjvënësve të kongresit.

Në dy takimet e fundit, banka qendrore e ka ngadalësuar hapin e rritjes së interesave me 25 pikë bazë. Pas këtyre komenteve, analistët vlerësojnë se ka 60% mundësi që Rezerva Federale të rrisë normën bazë të interesit me 50 pikë bazë në takimin e 21 dhe 22 marsit, nga 22% që ishte më parë. Ndërkohë, të dhënat mbi punësimin për shkurtin, që do të publikohen të premten do të jenë vendimtare në politikëbërjen e bankës qendrore amerikane.

Analistët parashikojnë se, ekonomia më e madhe në botë do të ketë krijuar edhe 203 mijë vende të reja pune, gjatë muajit të kaluar, nga rreth 517 mijë që krijoi në janar. Indeksi që mat ecurinë e dollarit amerikan, përballë shportës me 6 monedhat kryesore ndërkombëtare po qëndron në rreth 105.6, ndërsa në sesionin e kaluar u rrit me 1.3%. Në anën tjetër, euro ra me rreth 1.2%, duke zbritur pranë 1.055 dollarëve. Në tregun e kriptomonedhave, bitcoin ka zbritur poshtë 22 mijë dollarëve, ndërsa ethereum po tregtohet në rreth 1550 dollarë.

SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.