Protesta kundër industrisë bankare në Gjermani – Rriten ankesat për cilësinë e shërbimeve në katër vitet e fundit

Vonesat në procesin e mbylljes së llogarive, ndryshimet në termat dhe kushtet e shërbimeve, si dhe tkurrja e numrit të degëve në rrjetet bankare, janë disa nga ankesat kryesore të konsumatorëve në Gjermani. Sipas sondazheve të fundit, ankesat e qytetarëve për cilësinë e shërbimeve nga institucionet bankare janë rritur katër vitet e fundit

Ankesat e konsumatorëve kundër bankave dhe kompanive të tjera të sektorit financiar në Gjermani u rritën me një të pestën vitin e kaluar, sipas shifrave zyrytare. Për këtë arsye autoritetet rregullatore kompetente po bëjnë gjithçka që është e mundur për të forcuar besimin në këtë sektor. BaFin, mbikëqyrësi financiar i vendit, ka treguar vëmendje edhe më të madhe për mbrojtjen e konsumatorit

Në vitin 2022, autoriteti mbikëqyrës mori 15 mijë ankesa për bankat dhe ofruesit e tjerë të shërbimeve financiare, nga 12.500 në vitin 2021 – megjithatë, protestat dhe ankesat në Gjermani për cilësinë e shërbimeve bankare janë rritur ndjeshëm në katër vitet e fundit.

Ndër problemet e raportuara nga publiku konsumator janë vonesat në procesin e mbylljes së llogarive, ndryshimet në termat dhe kushtet e shërbimeve, si dhe tkurrja e numrit të degëve në rrjetet bankare, sipas zyrtarëve, drejtuesve të institucioneve të kreditit, por dhe organizatave për mbrojtjen e të drejtave të konsumatorëve. Shifrat, të raportuara nga agjencia e lajmeve Reuters për herë të parë, do të bëhen publike në një raport vjetor në maj.

Deutsche Kreditwirtschaft, një organ ombrellë, roli i të cilit është të ushtrojë presion institucional mbi grupet financiare gjermane, tha se bankat janë “shumë të qëndrueshme dhe të fuqishme” dhe besimi mbetet “i lartë” dhe “i paprekur” nga trazirat e fundit në SHBA dhe Zvicër.

Por pavarësisht deklaratave, një studim i vitit 2022 nga YouGov tregoi se shkalla e besimit në sektorin financiar të Gjermanisë, e nevojshme për të promovuar një stabilitet më të gjerë financiar dhe për të tërhequr kapital për të mbështetur rritjen ekonomike, ishte nën mesataren globale, duke mbetur prapa Kanadasë, Australisë dhe Azisë kryesore Juglindore.

Dorina Kurtaj / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.