Pse Danimarka po ngarkohet të bllokojë cisternat ruse të naftës?

Misioni i Kopenhagës do të mbështetet nga ligje që lejojnë shtetet të inspektojnë anijet e dyshuara se paraqesin një kërcënim mjedisor. Danimarka do të ngarkohet të inspektojë dhe të bllokojë potencialisht cisternat ruse të naftës që lundrojnë nëpër ujërat e saj sipas planeve të reja të Bashkimit Euopian, sipas raporteve.

Kombi i Europës Veriore do të synonte cisternat pa sigurim perëndimor, sipas ligjeve që lejojnë shtetet të kontrollojnë anijet për të cilat ata kanë frikë se përbëjnë një kërcënim mjedisor. Detyra e Kopenhagës vjen ndërsa Perëndimi eksploron më shumë mënyra për të siguruar përmbushjen e kufirit të tij prej 60 dollarësh (55 euro) për fuçi për naftën bruto ruse.

Zyrtarët perëndimorë kanë pranuar se “pothuajse asnjë” nga eksportet e papërpunuara të Moskës u shit nën kufirin prej 60 dollarësh për fuçi muajin e kaluar, raportoi të martën Financial Times. Paketa e 12-të e sanksioneve të Brukselit kundër Rusisë “do të përfshijë veprime për të shtrënguar kufirin e çmimit të naftës, për të ulur të ardhurat që vendi po merr nga shitja e naftës së tij – jo tek ne [BE] por tek të tjerët – dhe për të luftuar kundër shmangies”. Kështu tha të hënën shefi i politikës së jashtme të BE-së, Josep Borrell.

Udhëzimi i Danimarkës për të inspektuar cisternat ruse të naftës ka të ngjarë të jetë një nga masat brenda paketës së re të sanksioneve të BE-së, e cila do t’u paraqitet ministrave të jashtëm të vendeve anëtare të mërkurën. Kopenhaga u zgjodh kryesisht për shkak të vendndodhjes së saj gjeografike. E gjithë nafta e Moskës e dërguar përmes Detit Baltik – e cila përfaqëson rreth 60% të totalit të eksporteve të naftës së vendit nga deti – kalon ngushticat daneze në rrugën e saj drejt tregjeve ndërkombëtare.

Vendet e G7, BE-ja dhe Australia vendosën kufirin e saj prej 60 dollarësh për fuçi në eksportet ruse të papërpunuara dhjetorin e kaluar për shkak të konfliktit në Ukrainë. Guri i themelit të kufirit të çmimeve kanë qenë gjithmonë ndërmjetësit: siguruesit perëndimorë, kompanitë e transportit detar dhe pronarët e anijeve, të cilëve u kërkohet të raportojnë vetë se nuk po lëvizin naftën e Kremlinit me çmim mbi 60 dollarë.

Një numër në rritje i cisternave që transportonin naftë ruse dyshohet se lundrojnë me sigurime jo-perëndimore. Prandaj, autoritetet detare të Kopenhagës do të jenë përgjegjëse për të verifikuar nëse cisternat që lundrojnë në ujërat e saj u binden sanksioneve europiane.

BE-ja është gjithashtu e shqetësuar se sigurimet jo-perëndimore mund të mos jenë efektive në rast të një derdhjeje nafte, veçanërisht pasi shumë dërgesa ruse të naftës po kryhen në të ashtuquajturat “flota hije” të anijeve të vjetra, duke rrezikuar një fatkeqësi të madhe mjedisore.

Konventa e Kombeve të Bashkuara për të Drejtën e Detit, e cila rregullon trafikun detar, përfshin klauzola që lejojnë shtetet të “fillojnë procedurat, duke përfshirë ndalimin e anijes” duke pasur “prova të qarta objektive” që anija përbën një kërcënim të madh për dëmtimin e bregdetit.

Edel Strazimiri / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.