Punonjësit nuk pranojnë të dorëhiqen! – Stresi më i madh për Drejtorët Ekzekutivë
Tregu i punës po ndryshon sërish dhe kompanitë po përballen me një problem të paimagjinueshëm në epokën e njohur si “Dorëheqja e Madhe”. Tani të paktë janë ata që largohen vullnetarisht nga puna.
Qarkullimi ka rënë kaq ndjeshëm tek disa punëdhënës të mëdhenj, saqë ata po kërkojnë nga drejtorët ekzekutivë të vlerësojnë nëse duhet të shtyjnë në kohë projektet, apo të shkurtojnë staf me afrimin e fundit të vitit. Në disa raste, thanë drejtuesit, qarkullimi po kthehet në nivelet para pandemisë pas viteve të trazirave të tregut të punës.
Punësimi u ngadalësua ndjeshëm në tetor, me punëdhënësit amerikanë që shtuan gjysmën e vendeve të punës në krahasim me muajin shtator, sipas Departamentit të Punës. Shkalla e papunësisë u rrit në 3.9% nga 3.8%, por mbetet pranë niveleve më të ulëta historike.
Në nivel kombëtar, shkalla e dorëheqjeve, numri si përqindje e punësimit total, mbeti në 2.3% në shtator për muajin e tretë radhazi, nga 3% në prill 2022. Niveli i dorëheqjeve shënoi një rekord gjatë pandemisë pasi punonjësit kërkuan paga ose kushte më të mira pune, duke çuar në një fenomen që u bë i njohur gjerësisht si ‘Dorëheqja e Madhe’.
Këtë vit, 73% e punonjësve thanë se planifikojnë të qëndrojnë në punët e tyre, nga 61% vitin e kaluar, sipas një sondazhi të publikuar në tetor.
Dorina Kurtaj /SCAN
Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.