Qeveria italiane ndërpret ndihmat për mijëra familje me SMS – Protesta masive ndaj qeverisë Meloni!

Rreth 169,000 familje në të gjithë Italinë morën një SMS në fund të korrikut që i njoftonte se ndihmat që kishin përfituar për katër vitet e fundit do të ndërpriteshin papritur muajin e ardhshëm. Përfitimet, të cilat do t’i hiqen çdo familjeje që nuk përfshin persona me aftësi të kufizuara, të mitur ose individë mbi moshën 65 vjeç, janë pjesë e “reddito di cittadinanza” (fjalë për fjalë “të ardhurat e qytetarëve”) të diskutueshme të Italisë, një ndihmë mujore për familjet dhe individët me të ardhura të ulëta dhe të papunët.

Programi i pagesës së përfitimeve të mirëqenies u prezantua në vitin 2019 nga qeveria e udhëhequr nga Giuseppe Conte, një anëtar i partisë Lëvizja Pesë Yjet (M5S), dhe tani po shpërbëhet nga qeveria e ekstremit të djathtë të Giorgia Melonit. Të ardhurat e qytetarëve ishin një nga premtimet kryesore të bëra nga Lëvizja Pesë Yjet përpara se të vinte në pushtet në vitin 2019, pavarësisht se koncepti ishte thellësisht i diskutueshëm në vend dhe kundërshtohej ashpër nga e djathta.

Meloni njoftoi vendimin e saj për të shtrënguar sistemin e mirëqenies sociale sapo erdhi në pushtet si kryeministre e re e Italisë vitin e kaluar, duke deklaruar se do të shfuqizohet plotësisht deri në 1 janar 2024 për të papunët nga mosha 18 deri në 59 vjeç që konsiderohen të aftë për punë. “Duam ta shndërrojmë ndihmën në punësim”, tha ajo gjatë një konference për shtyp në nëntor 2022. “Ka njerëz që marrin subvencionin prej tre vitesh, shteti duhet t’i ndihmojë këta njerëz që të gjejnë punë.”

Ish-kryeministri Conte, i cili drejtoi Italinë përmes krizës Covid, kritikoi vendimin e Meloni duke thënë se ajo “po luante me jetët e njerëzve” dhe se ata në të 50-at dhe 60-at e tyre që aktualisht mbështeten në të ardhurat e qytetarëve do ta kenë të vështirë të rikualifikohen dhe të gjejnë punë të reja. Sipas medias italiane të lajmeve Rai News, 80,000 familje të tjera do të shkëputen nga përfitimet midis gushtit dhe shtatorit.

Vërshimi i mesazheve SMS që u njoftonin familjeve se nuk do të merrnin më përfitime nxiti protesta të ashpra në qytetin jugor të Napolit dhe provincën e tij, i cili është shtëpia e numrit më të madh të marrësve. Zyrat e Institutit Kombëtar të Sigurimeve Shoqërore të vendit (INPS) në rajon raportuan se kishin marrë qindra telefonata nga njerëz që kërkonin një shpjegim më të mirë se ai që përmbant mesazhi.

Në mesazhin e marrë nga mijëra familje thuhet: “Kërkesa për të ardhura të qytetarëve pezullohet sipas nenit 48 të dekretit 20/23 në pritje për t’u marrë në dorëzim nga shërbimet sociale”. Në italishten origjinale, mesazhi është i gjatë vetëm 24 fjalë. Duke filluar nga 1 shtatori, ata që tani u janë ndërprerë përfitimet do të marrin 350 euro në muaj për t’u përdorur për trajnime për punë në qendrat e papunësisë në vend.

Pezullimi i të ardhurave të qytetarëve ka ndezur një debat të furishëm në parlamentin italian, me Conte që akuzon Vëllezërit e Italisë së Melonit dhe qeverinë e koalicionit se po përpiqen të “shqyejnë vendin”. Në qershor, shkalla e papunësisë në Itali ra në 7.4%, me një total prej 23 milionë e 590 mijë të punësuar në vend, +0.3%. Pavarësisht zhvillimit pozitiv, Italia ka ende një nga normat më të larta të papunësisë në Bashkimin Europian, me bllokun që ka një normë mesatare prej 5.9% që nga qershori 2023.

Edel Strazimiri / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.