Rënia e euros ndryshon kërkesat për produktet e importit – Shqiptarët shtojnë blerjet e ushqimeve e pijeve nga jashtë, bum i makinerive e paisjeve

Ndërsa euro i është drejtuar përsëri niveleve rekord të zhvlerësimit në raport me lekun, nënçmimi i saj përgjatë vitit të fundit ka ndikuar edhe në përqasjen e shqiptarëve ndaj produkteve të importit. Në harkun kohor të një viti, qytetarët kanë shtuar blerjet e ushqimeve e pijeve të importit. Gjithsesi, kanë qenë makineritë, paisjet e pjesët e kembimit që kanë shënuar një bum të vërtetë 12 muajt e fundit. Në rënie të dukshme janë mobiljet dhe punimet e drurit, ashtu si dhe tekstilet e importit.

Nga të dhënat e INSTAT, importet në total rezultojnë 39.5 miliardë lekë në muajin tetor, në rënie prej 6.3% krahasuar me tetorin e vitit të shkuar. Rënie që i dedikohet në masë të konsiderueshme rënies së çmimeve me të cilat bien produktet e importit veçanërisht në tregjet europiane. Por me gjithë rënien e çmimeve, i matur në bazë vjetore, gruupi “Ushqime, pije, duhan” rezulton në rritje me +1,3 pikë përqindje, duke shkuar nga 11.8 miliardë lekë në tetor 2022, në 12.9 miliardë në tetorin që sapo lamë pas. Ndërkohë që kanë qenë makineritë e paisjet e importuara ato, që të favorizuara nga leku i fortë, kanë shënuar një bum të vërtetë gjatë 12 muajve të fundit. Ato kanë një rritje prej 1% në terma vjetorë, por për periudhën janar-tetor rezultojnë në total 176.3 miliardë lekë, nga 150 miliardë për të njëjtën periudhë të një viti më parë. Diferenca është plot 26 miliardë lekë, apo afërsisht 260 milionë euro me kursin aktual të këmbimit.

Rritje në bazë vjetore kanë shënuar edhe materialet e ndërtimit, por në masë më të moderuar, ashtu si edhe produktet kimike dhe plastike. Në rënie kanë qenë gjatë 12 muajve të fundit grupet e tekstileve dhe këpucëve. Nga 10 miliardë në tetor 2022, ky grup ka rënë në 8.8 miliardë në tetorin që sapo lamë pas, me një tkurrje prej -1.4 pikë përqindjeje, ashtu si dhe grupi “Prodhime druri dhe letre” me -0,5 pikë përqindje.

Gjithsesi, tkurrjen më të madhe në bazë vjetore e ka pësuar grupi “Minerale, lëndë djegëse, energji elektrike” me -8,6 pikë përqindje, si për shkak të rënies së çmimeve të hidrokarbureve, por edhe prej situatës së mirë hidrike që ka shoqëruar këtë vit.

Lorenc Rabeta / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.