Rikthehet kaosi te fluturimet në Europë – Pasagjerët paralajmërohen për një sezon veror vërtet sfidues

Kaosi i udhëtimeve mund të rikthehet këtë verë pasi industria e aviacionit paralajmëron për aeroporte të mbingarkuar, qiell të mbushur me njerëz dhe kohë më të gjata fluturimi.

Eurocontrol, organizata që menaxhon hapësirën ajrore të Europës, paralajmëroi se kjo verë do të jetë një periudhë “sfiduese” me rreth 33 mijë fluturime në ditë gjatë tetë javëve të ardhshme. Të premteve, një nga ditët më të njohura për të udhëtuar, ky numër mund të kalojë 34 mijë.

Kjo situatë regjistron 8 % më shumë fluturime në përgjithësi sesa janë nisur gjatë së njëjtës periudhë të vitit të kaluar. Por ndërsa trafiku ajror vazhdon të rritet në periudhën e pikut të verës, pasagjerët mund të përballen me një verë tjetër vonesash, ndërprerjesh dhe anulimesh. Me rritjen e kërkesës ka dhe më shumë presion mbi industrinë për të përballuar sfidat e saj aktuale.

Muajin e kaluar, Shoqata Ndërkombëtare e Transportit Ajror tha se kërkesa për udhëtim ajror është rritur falë rikthimit të besimit pas pandemisë COVID-19. Dhe Komisioni Europian i Udhëtimit ka parashikuar një ‘oreks të fortë’ për pushime në Europë këtë verë.

Vetë Eurocontrol raportoi se rekordi për lëvizjen më të madhe të avionëve në një aeroport ishte thyer muajin e kaluar nga Aeroporti i Stambollit në Turqi – 1.684 fluturime në total.

Rritja e trafikut ajror ka bërë që organizata japë paralajmërime për qytetet dhe rajonet kryesore në të gjithë Europën, duke përfshirë Athinën, Barcelonën, Brukselin, Budapestin dhe Londrën. Sipas saj pasagjerët mund të përballen me kohë më të gjata fluturimi dhe vonesa të konsiderueshme pasi linjat ajrore përpiqen të shmangin zonat e mbipopulluara.

Drejtori i përgjithshëm i Eurocontrol, paralajmëroi se Europa po përballet me një verë “sfiduese”. Përveç rritjes së numrit të fluturimeve, ka rreth 20 % më pak hapësirë ​​ajrore në dispozicion për shkak të luftës në Ukrainë, duke krijuar presion të mëtejshëm.

Kur qiejt janë të zënë, numri i fluturimeve që mund të hyjnë në një zonë të kontrollit të trafikut ajror mund të kufizohet për të parandaluar që kontrollorët të mbingarkohen. Linjat ajrore mund të detyrohen të fluturojnë në rrugë më të gjata ose pasagjerët mund të vonohen pasi kontrollorët e trafikut ajror përballen me mbipopullimin. Athina në Greqi dhe Reims dhe Marseille në Francë ka të ngjarë të preken në shumicën e ditëve të kësaj vere, sipas Eurocontrol.

Në ditët e pikut si të premtet ose fundjavat e verës, Budapesti, Varshava dhe Nikosia gjithashtu mund të përjetojnë “mbingarkesa të larta” trafiku. 8 dhe 15 korrik mund të shohin një mbingarkesë të lartë edhe në Zagreb dhe Beograd.

Londra, Barcelona dhe Brukseli gjithashtu kanë marrë paralajmërime të ngjashme.

Dorina Kurtaj / SCAN

 

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.