Parisi zëvendëson Londrën në sistemin bankar – Strategjia me tre shtylla e Macron për të nxitur sektorin financiar

Vetëm pak kilometra larg Nanter me popullsi të dendur, epiqendra e trazirave që shpërthyen ditët e fundit në Francë për vdekjen e një djali 17-vjeçar franko-algjerian nga zjarri i policisë, sektori financiar po lulëzon. Plani ambicioz i presidentit Macron për të tërhequr investitorët thekson më tej hendekun midis të pasurve dhe atyre që nuk kanë dhe rrezikon të rrisë tensionet sociale.

Dhe ndërsa Macron thuhet se ka refuzuar premtimin e tij për të mbyllur hendekun racor dhe ekonomik, ka tregues se ai e ka realizuar një tjetër premtim: të sigurojë që Parisi gradualisht të zëvendësojë Londrën si qendra financiare e botës. Në sfondin e Brexit, ish-bankieri Macron synoi ta kthente Parisin në trampolinë e re ekonomike të Europës. Sipas ekspertëve kur mori detyrën gjashtë vjet më parë ai kishte një strategji të qartë: të ishte përfituesi kryesor i Brexit-it. Dhe kjo është ajo që ai bëri. Fitimi më i madh i Francës në shërbimet financiare erdhi nga pesë bankat e mëdha të investimeve amerikane, të cilat kanë zhvendosur të paktën 1600 punonjës në Paris. Në vitin 2021, një studim vjetor zbuloi se Franca e kaloi Mbretërinë e Bashkuar në numrin e investimeve direkte të SHBA-së në shërbimet financiare që shkojnë në Europë.

Parisi ka qenë gjithmonë një destinacion tërheqës për investime, megjithatë politika të caktuara të Macron e kanë forcuar trendin. Zyrtarët përshkruajnë një strategji me tre drejtime. E para u fokusua në reformën tatimore. Ndërsa Britania e Madhe sapo rriti taksën e saj jashtëzakonisht të ulët të korporatave prej 19% në 25%, Franca e ka ulur të sajën në vitet e fundit nga 33%, gjithashtu në 25%, ndërsa vendosi ulje tatimore deri në 50% për drejtuesit e huaj dhe emigrantët që kthehen në shtëpi. Rezultati ka qenë një fluks global i drejtuesve: Banka e Amerikës në Paris, tani punëson rreth 600 punonjës nga 49 vende të ndryshme, nga 70 disa vite më parë. Shtylla e dytë e Macron lidhet me konkurrencën. Krahas rregullimit të diskutueshëm, por kritik të pensioneve për të rritur moshën e pensionit nga 62 në 64 vjeç, një sërë reformash në tregun e punës i bëjnë kushtet e punësimit më fleksibël. E treta ishte stabiliteti politik, edhe nëse Macron vështirë se mund të pretendojë më në fund rolin e liderit popullor. Megjithatë, ai do të jetë në Pallatin Élysée deri në vitin 2027, ndërsa ministri i tij i financave, Bruno Le Maire, ka qëndruar në detyrën e tij për gjashtë vjet.

Dorina Kurtaj / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.