Rreziqet financiare të lidhura me klimën – Për herë të parë vendi ynë ka një strategji hartuar nga Banka e Shqipërisë

Për herë të parë vendi ynë ka tashmë një strategji për administrimin dhe mbikëqyrjen e rreziqeve financiare të lidhura me klimën në sektorin financiar për vitet 2023-2025. Strategjia dhe plani i veprimit hartuar nga Banka e Shqipërisë e vë theksin te përfshirja dhe koordinimi i të gjitha institucioneve private dhe publike.

Sipas Bankës Qendrore, sistemi financiar luan një rol kyç në lidhje me ndryshimet klimatike, pasi këto fenomene dhe tranzicioni janë burim rreziku për institucionet financiare. Nga ana tjetër, nuk ka zhvillim të qendrueshëm pa financim të qendrueshëm dhe ato janë kryesore në zbutjen e rreziqeve të ardhshme klimatike për Shqipërinë.

Sektori bankar ka gjasa të marrë rolin e udhëheqësit për kompanitë në Shqipëri, për shkak të natyrës së pazhvilluar dhe të cekët të tregjeve të kapitalit, jo vetëm duke “kanalizuar fondet”, por edhe duke “edukuar klientët” për të qenë më të qëndrueshëm.

“Kjo është e nevojshme nëse duam të arrijmë qëndrueshmëri fiskale, të rrisim transparencën dhe në fund të hedhim bazat për një rritje të qëndrueshme ekonomike”, nënvizohet në dokument. Kështu që, nëse arrihet të miradministrohet, nga kalimi në një ekonomi me emetime neto zero mund të përfitojë potencialisht i gjithë vendi në planin afatgjatë.

Në këtë kontekst, Banka e Shqipërisë është e interesuar të kuptojë më mire pasojat ekonomike dhe financiare të ndryshimeve klimatike dhe kalimin në një ekonomi me emetim neto zero, si dhe përshtatjen e kuadrit të politikës të saj me këto ndryshime.

Duke qenë se rreziqet klimatike transmetohen në rreziqe financiare, roli i Bankës së Shqipërisë në identifikimin, monitorimin dhe administrimin e tyre është shumëplanësh. Prandaj, pjesa thelbësore e strategjisë përfshin një plan veprimi, i cili përmban një sërë aktivitetesh që do të ndërmerren nga departamente të ndryshme brenda Bankës së Shqipërisë, në varësi të mandatit dhe urgjencës së tyre për të vepruar.

Dorian Koça/SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.