Rriten ankesat ndaj Prokurimeve Publike – U regjistruan 866 të tilla në 2023, 57 më shumë se një vit më parë

Komisioni i Prokurimeve Publike, për vitin që lamë pas ka regjistruar 866 ankesa në total. Duke krahasuar me Raportin e vitit 2022, 2023-shi u mbyll me 57 ankesa më shumë.

Por çfarë ankesash janë regjistruar për një vit?

Referuar të dhënave të Buletinit, ankesat e regjistruara për procedura të prokurimit publik janë 732, ndërsa përsa i përket fazës së procesit për të cilën është paraqitur ankimi, vlen për t’u theksuar se për gjatë 2023, janë regjistruar 369 ankesa për Dokumentet Standarde të Tenderit dhe 468 të tilla për Vlerësim Ofertash.

Por duke u fokusuar sipas llojit të kontratës, janë regjistruar 73 ankesa për Punë Publike, 555 për mall, si dhe 235 ankesa për shërbime.

Ankesat ndahen sipas qarqeve, e ai i Tiranës kryeson për numrin më të lartë të ankesave duke arritur në 563 ankesa, e vijuar me qarqet të Shkodrës dhe Vlorës ku përkatësisht kanë 50 dhe 44 ankea.

Qarku i Elbasanit dhe Fierit në një vit kanë depozituar 42 ankesa secili, por ai i Durrësit vetem 39, ndërsa Korçës 27. Ndërkaq, 15 ankesa ka regjistruar qarku i Dibrës për një vit, ndërsa i Lezhës dhe Gjirokastrës vetëm nga 12 secili.  Dy qarqet që janë ankuar më pak është ai i Beratit dhe Kukësit me 10 ankesa secili.

Duke ju referuar raportit të vitit 2022, Komisioni i Prokurimit Publik ka shqyrtuar në total 809 ankesa, ndërsa pas tejkalimit të afatit ligjor, përcaktuar për zbatimin e vendimeve nga ana e autoritetit kontraktor, ka dërguar 43 kërkesa drejtuar autoriteteve kontraktore për zbatim vendimi.

Si qarqet me numrin më të lartë të ankesave për vitin 2022, mbetet ai i Tiranës me 556 të tilla e pasuar me qarkun e Fierit me 51 ankesa e më pas ai i Durrësit me 44 të tilla.

Diamila Leka/ SCAN

 

 

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.