Rriten pagat për stafin e British Airways – Do të marrin 13% më shumë për të kompensuar inflacionin e lartë

Rreth 24,000 punonjës të kompanisë ajrore British Airways do të marrin një rritje page prej 13.1% gjatë 18 muajve, deklaroi sindikata Unite. Kjo rritje pasqyron nivelin e lartë të inflacionit të vendit dhe rikthimin e udhëtimeve pas pandemisë.

Unite tha në një deklaratë se marrëveshja përfshinte gjithashtu një pagesë të njëhershme prej 1000 paund dhe mundësinë që paga të rritet më tej gjatë periudhës nëse inflacioni mbetet i lartë. Inflacioni në Britani arriti nivelin më të lartë të 41 viteve prej 11.1% vitin e kaluar dhe ka rënë më ngadalë se në vendet e tjera, 7.9% në qershor, më i larti ndër ekonomit e mëdha.

Punonjësit në kompaninë British Airways, e cila është në pronësi të kompanisë mëmë IAG, votuan për ofertën 13.1% duke e pranuar atë.

Të gjithë sektorët në Brritani sidomos gjatë vitit të kaluar kanë zhvilluar greva duke kërkuar rritjen e pagave. Vendi regjistroi numrin më të madh të ditëve të punës të humbura për shkak të grevave në vitin 2022 në më shumë se 30 vjet. Rreth 2.5 milionë ditë pune u humbën për shkak të grevave dhe protestave, shifra më e lartë që nga viti 1989 kur u humbën 4.1 milionë ditë pune.

Dorian Koça/SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.