Vendet baltike shkëputen nga rrjeti energjetik rus – Lidhja me sistemin e BE do të kryhet verën e ardhshme

Estonia, Letonia dhe Lituania kanë rënë dakord të përshpejtojnë integrimin e tyre në sistemin elektrik të Bashkimit Europian në mënyrë që të shkëputen nga rrjeti energjetik rus. Tre vendet baltike, të cilat janë anëtarë të BE-së dhe NATO-s, mbeten ende pjesë e sistemit energjetik BRELL të epokës sovjetike, që përfshin gjithashtu Bjellorusinë dhe frekuencat e të cilit kontrollohen nga Moska, duke i lënë ato të cenueshme ndaj Kremlinit.

Tre vendet ranë dakord në vitin 2018 për t’u shkëputur nga Moska dhe bashkuar me sistemin e BE-së deri në fund të vitit 2025, por lufta e Rusisë ndaj Ukrainës nxiti përpjekjet për të përshpejtuar afatin kohor. Një marrëveshje e arritur këtë javë nga operatorët e tyre përkatës të sistemit të transmetimit të energjisë elektrike tani do t’i shohë ata plotësisht të ndarë nga BRELL në shkurt 2025.

Udhëheqësit e tre vendeve nënshkruan së fundmi marrëveshjen dhe deklaruan se sinkronizimi i tyre me Rrjetin e Europës Kontinentale “ka rëndësi strategjike jo vetëm për këto vende, por për të gjithë Bashkimin Europian” dhe se mbështetja e vazhdueshme në sistemin BRELL “është një kërcënim për sigurinë energjetike të shteteve baltike”.

Estonia, Letonia dhe Lituania tashmë janë të lidhura me partnerët europianë përmes linjave të energjisë elektrike me Poloninë, Suedinë dhe Finlandën. Ndërkohë, Lituania është tashmë e pavarur nga Moska, pasi ka ndaluar importin e produkteve ruse të energjisë, përfshirë energjinë elektrike, në fund të majit 2022, në përgjigje të pushtimit të Ukrainës.

Sipas marrëveshjes, vendet baltike do të tërhiqen bashkërisht nga kontrata e tyre BRELL në verën e vitit 2024, gjashtë muaj përpara sinkronizimit me sistemin e BE-së.

Dorian Koça/SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.