Rritja e rezervave në SHBA rrëzon naftën – Në sesionin e kaluar, çmimet u rritën me rreth 3%. Ndikoi dobësimi i dollarit

Nafta po qëndron në rënie të lehtë në sesionin e sotëm, pasi të dhënat e industrisë në SHBA treguan një rritje të ndjeshme të rezervave, gjatë javës së kaluar, kundrejt parashikimeve të analistëve për një rënie të tyre. Këto të dhëna kanë përforcuar shqetësimin për ngadalësimin e kërkesës, në një kohë që furnizimi i tregut po tkurret. Nafta Bruto amerikane po tregtohet në rreth 75 dollarë për fuçi, ndërsa në sesionin e kaluar u rrit me rreth 3%.

Nafta Brent e Londrës po tregtohet në rreth 80 dollarë për fuçi. Referuar të dhënave në SHBA, rezervat e naftës bruto u rritën me 7.8 milionë fuçi, gjatë javës që u mbyll më 9 dhjetor, ndërsa analistët parashikonin një rritje prej 3.6 milionë fuçi. Paralelisht, edhe rezervat e benzinës u rritën me 900 mijë fuçi. Gjithsesi, investitorët po presin të dhënat zyrtare që publikohen nga Administrata për Informimin mbi Energjinë, më vonë gjatë ditës së sotme.

Në sesionin e kaluar, ndërkohë, çmimet u rritën ndjeshëm për shkak të dobësimit të dollarit amerikan, por edhe lehtësimit të masave kundër Covid-19 në Kinë. Një tjetër mbështetje, çmimet e kanë gjetur edhe nga mbyllja e tubacionit Keystone, që transporton rreth 620 mijë fuçi nga Kanadaja drejt Shteteve të Bashkuara.

SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.