Rritje e çmimit të naftës për Europën dhe Azinë – Vendimi i Arabisë Saudite, pas shtimit të kërkesës nga këto kontinente

Ndërsa kontratat e së ardhmes së naftës janë dobësuar pak këtë vit, shumë tregtarë dhe drejtues të energjisë i shohin ato duke u ngjitur – ndoshta në 100 dollarë për fuçi – në një kohë që ekonomia e Kinës rimëkëmbet pas heqjes së kufizimeve kundër koronavirusit dhe inflacioni në ekonomitë e tjera të mëdha ngadalësohet.

Saudi Aramco i kontrolluar nga shteti në Arabinë Saudite, rriti shumicën e çmimeve zyrtare të shitjeve për Azinë për muajin prill.

Rritja kryesore e kompanisë Arab Light ishte deri në në 2.50 dollarë për fuçi mbi standardin rajonal, 50 cent më shumë se niveli i marsit. Kjo ishte në përputhje me një studim të Bloomberg të rafinerëve dhe tregtarëve, i cili parashikoi një rritje prej 55 cent. Është muaji i dytë me radhë për të cilin Aramco ka rritur çmimet për Azinë, tregun e saj më të madh.

Çmimet për klientët amerikanë kanë mbetur të pandryshuara. Ato për Europën Veri-Perëndimore dhe Mesdheun u regjistruan deri në 1.30 dollarë për fuçi.

Nafta e papërpunuar Brent ka rënë me 0.1 për qind këtë vit në 85.83 dollarë për fuçi. Ndërsa ka rënë nga rreth 115 dollarë që nga mesi i vitit 2022, me një ngadalësim të ekonomisë globale dhe norma më të larta interesi që kundërshtojnë ndërprerjet e furnizimit të shkaktuar nga kriza ukrainase. Shefi ekzekutiv i Aramco sugjeroi javën e kaluar se ai sheh një kthesë në këtë situatë, duke shpjeguar se kërkesa nga Kina është shumë e fortë. Por është gjithashtu “e shkëlqyer” në Europë dhe SHBA, shtoi ai.

Arabia Saudite është eksportuesi më i madh i naftës në botë dhe kryeson grupin e prodhuesve të OPEC + së bashku me Rusinë. Aleanca 23-vendesh ka sugjeruar se nuk do të rrisë prodhimin të paktën deri vitin e ardhshëm.

Aramco shet rreth 60% të dërgesave të saj të papërpunuara në Azi, shumica e tyre me kontrata afatgjata, çmimi për të cilat rishikohet çdo muaj. Kina, Japonia, Koreja e Jugut dhe India janë blerësit më të mëdhenj. Vendimet e çmimeve të kompanisë shpesh ndiqen nga prodhues të tjerë të Gjirit si Iraku dhe Kuvajti.

Dorina Kurtaj/ SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.