Rritje e papritur e pagave në Britani – Shtohet mundësia për norma më të larta interesi

Paga më të larta dhe rritja e punësimit në Britaninë e Madhe shënuan shifra të reja në tre muajt deri në prill, duke shtuar pritshmëritë se Banka e Anglisë do të rrisë përsëri normat e interesit, ndoshta disa herë, për të frenuar presionet e pandërprera inflacioniste.

Të dhënat nga Zyra për Statistikat Kombëtare – ONS, bënë të qartë se tregu i punës ishte më i nxehtë nga sa kishin parashikuar të gjithë ekonomistët e anketuar nga Reuters, duke forcuar paundin dhe duke shkaktuar një rënie tjetër në çmimet e bonove të qeverisë britanike.

Shifrat e fundit i shtohen sinjaleve se ekonomia nuk po ‘ftohet’ siç kishte shpresuar banka qendrore, pasi Britania lufton me një nga nivelet më të larta të inflacionit mes ekonomive kryesore të përparuara.

Rritja vjetore e pagave duke përjashtuar bonuset arriti në 7.2% gjatë tre muajve deri në prill, nga 6.8% në tre muajt deri në mars. Përjashtuar periudhën e pandemisë COVID-19, ky ishte leximi më i lartë i regjistruar.

Duke përfshirë bonuset, rritja e pagave ishte 6.5% nga 6.1% më parë, por ende ngeci në inflacionin e çmimeve të konsumit në 8.7% në prill, që do të thotë se britanikët po vuajnë nga rënia e pagave në terma realë. Punësimi u rrit me 250 mijë në tre muajt deri në prill, kundrejt parashikimit të sondazhit të Reuters për një rritje prej 162 mijë. Shkalla e papunësisë, e cila pritej të rritej në 4%, ra në 3.8% në tre muajt deri në prill nga 3.9% në tre muajt deri në mars.

Të dhënat e muajit prill janë të parat që përfshijnë ndikimin e një rritjeje prej 9.7% të pagës minimale dhe do të analizohen nga afër nga Banka e Anglisë ndërsa ajo përpiqet të gjykojë shkallën e ndikimit nga periudha e fundit së inflacionit dyshifror.

Zyrtarët e bankës qendrore ka të ngjarë të vërejnë se të dhënat kryesore të punësimit dhe pagave rezultuan mbi të gjitha parashikimet, ndërsa shkalla e papunësisë ishte nën të gjitha parashikimet.

Dorina Kurtaj /SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.