Rritje e pensionit me 600 euro në vit – Macron: Nuk jam penduar për reformën e pensioneve!

Presidenti i Francës Emmanuel Macron iu drejtua vendit të tij të mërkurën mbrëma pas javësh protestash dhe grevash mbi një plan për të rritur moshën e pensionit nga 62 në 64. Gjatë intervistës së shumëpritur, të transmetuar në televizionin TF1 dhe France 2, Macron qëndroi fuqishëm pas qeverisë së tij dhe planit shumë të diskutueshëm të daljes në pension.

Macron tha se rishikimi i tij i diskutueshëm i pensioneve ishte “i nevojshëm” për të balancuar sistemin e pensioneve të Francës gjatë viteve të ardhshme mes ndryshimit të demografisë.

Macron, mbështetja e të cilit është më e larta në mesin e pensionistëve dhe punëtorëve të moshuar, tha se 1.8 milionë pensionistë “do të fillojnë të shohin rritjen e pensionit të tyre me një mesatare prej 600 euro në vit” si rezultat i ndryshimeve.

Presidenti gjithashtu dëshironte të “riangazhohej” në dialog me partnerët socialë për kushtet e punës dhe të dëgjonte “nevojën për drejtësi” të shprehur nga demonstruesit. Ai premtoi se diskutimi do të kishte të bënte veçanërisht me evolucionin e karrierës ose vështirësitë dhe do të mbahej “në javët e ardhshme”.

Sindikatat reaguan shpejt ndaj fjalëve të presidentit, duke e akuzuar atë për “përçmim” dhe “gënjeshtra” në mënyrë që të “fshehte paaftësinë e tij për të gjetur një shumicë për të votuar për reformën e tij të padrejtë”.

Presidenti francez, i cili nuk mund të kërkojë rizgjedhje pas përfundimit të mandatit të tij të dytë në 2027, tha se ishte i përgatitur të pranonte jopopullaritetin për reformën e diskutueshme, e cila sipas sondazheve kundërshtohet nga më shumë se dy të tretat e francezëve.

Macron pa vlerësimin e tij të pëlqimit të rënë në 28% javën e kaluar, sipas një sondazhi të Ifop, niveli i tij më i ulët që nga kriza e Jelekëve të Verdhë në 2019. Sondazhi u krye përpara se ai të përdorte fuqitë e posaçme ekzekutive për të detyruar reformën e tij të pensioneve, duke zemëruar më tej kritikët e tij.

Emmanuel Macron denoncoi “cinizmin” e disa “kompanive të mëdha” që kanë bërë fitime të mëdha të papritura që nga fillimi i luftës në Ukrainë duke i lejuar ata të blejnë aksionet e tyre në bursë dhe u kërkoi atyre “një kontribut të jashtëzakonshëm” në mënyrë që “Punëtorët të mund të përfitojnë” nga këto para.

Edel Strazimiri / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.