Rusia: Nuk ka ‘deklarata të reja’ lidhur me marrëveshjen e grurit me Turqinë!

Rusia nuk ka bërë asnjë “deklaratë të re” në lidhje me marrëveshjen e grurit, tha zëdhënësi i Kremlinit Dmitry Peskov, duke hedhur poshtë në mënyrë efektive pretendimet për një marrëveshje të presidentit të Turqisë, Recep Tayip Erdogan.

Të enjten, Erdogan tha se ekziston një “mirëkuptim i ndërsjellë” midis tij dhe presidentit rus Vladimir Putin për zgjatjen e marrëveshjes së grurit.

Marrëveshja, e nënshkruar pesë muaj pas pushtimit rus të Ukrainës, do të skadojë të hënën dhe Putin ka kërcënuar vazhdimisht se nuk do ta rinovojë atë për shkak të pengesave ndaj eksporteve të Rusisë.

Vetëm një ditë më parë, vetë Putin tha se marrëveshja do të zgjatet vetëm kur dhe nëse plotësohen të gjitha kërkesat ruse.

Ajo ka ngritur shqetësime serioze ndërkombëtare. Presidentja e Komisionit Evropian, Ursula von der Leyen, ka paralajmëruar se “Rusia ka përgjegjësinë ta zgjasë atë (marrëveshjen), përndryshe pasojë do të jetë pasiguria globale ushqimore. Kështu që tani topi është në fushën e Presidentit Putin dhe bota po e shikon”.

Moska thotë se një pjesë e marrëveshjes për zhbllokimin e eksporteve ruse të grurit dhe plehrave nuk po zbatohet plotësisht.

Ministri i Jashtëm rus Sergei Lavrov tha se Putin dhe Erdogan “kishin diskutuar prej kohësh planet për të siguruar që furnizimet me grurë në vendet në zhvillim të vazhdojnë, pavarësisht nga çdo palë tjetër”.

Nuk është e qartë se çfarë do të thotë kjo, por me siguri se Rusia po kërkon mënyra për të rritur eksportin e drithit të saj, si dhe të grurit nga territoret e pushtuara të Ukrainës.

Edel Strazimiri / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.