Rusia shton 9.5 miliardë dollarë në fondin e emergjencave – Paratë do të përdoren kryesisht për sigurimin e zhvillimit të ekonomisë

Qeveria e Rusisë ka shtuar 9.5 miliard dollarë në fondin e saj të rezervave për emergjenca, në një moment që Kremlini shënon një hap më shumë në përpjekjet për të mbrojtur ekonominë nga pasojat e sanksioneve perëndimore dhe veprimeve ushtarake në Ukrainë. Në një deklaratë për media qeveria ruse sqaroi se fondi do të përdoret pjesërisht për të implementuar masa që synojnë sigurimin e stabilitetit të zhvillimit ekonomik në kushtet e kufizimeve të jashtme.

Rritja e rezervave erdhi nga fitimet shtesë të gjeneruara nga eksportet e naftës dhe gazit të Rusisë, të cilat po sjellin qindra milionë dollarë në ditë në buxhet, pavarësisht sanksioneve perëndimore.

Vendet perëndimore kanë goditur Rusinë me një paketë të paprecedentë sanksionesh, duke përfshirë ngrirjen e rreth gjysmës – ose 300 miliardë dollarë – të rezervave të arit dhe valutës së huaj të bankës qendrore pasi Moska dërgoi dhjetëra mijëra trupa në Ukrainë më 24 shkurt në atë që ajo e cilëson si “operacion special ushtarak”.

Rusia i drejtoi më parë fitimet e naftës dhe gazit në fondin e saj të pasurisë sovrane prej 198 miliardë dollarësh, një arkë rezervash që synonte të financonte projekte të mëdha investimi.

Por fondi rezervë i urgjencës është një buxhet më fleksibël i parave, duke i lejuar qeverisë të mbyllë deficitin e saj, të mbështesë shpenzimet sociale siç është rritja e fundit emergjente e pensioneve dhe të reagojë ndaj krizës ekonomike.

Qeveria shtoi 13.56 miliard dollarë në të njëjtin fond në muaji maj të këtij viti.

Ekonomia e Rusisë po përballet me recesionin e saj më të madh në më shumë se dy dekada, pasi vendi po përjeton atë që Instituti i Financave Ndërkombëtare e ka cilësuar si një “shpërbërje të plotë të 30 viteve të investimeve” që mund të zhdukë përfitimet ekonomike të grumbulluara prej 15 vitesh.

Kremlini ka filluar tashmë të përdorë burimet e tij për të mbështetur bizneset më të mëdha të vendit në një përpjekje për të zbutur një krizë ekonomike që ka regjistruar një rritje të inflacionit në nivelet më të larta në dy dekada, në një kohë që pritet dhe rënia e të ardhurave të familjeve në muajt e ardhshëm.

Në muajin maj, qeveria injektoi 4 miliardë dollarë për Hekurudhat Ruse, punëdhënësi më i madh i vendit, dhe ka premtuar 1.75 miliardë dollarë për linjën ajrore shtetërore Aeroflot.

SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.