Sesion i qetë për bursat europiane – Të martën realizuan fitimet më të mëdha ditore në 1 vit

Bursat europiane po qëndrojnë në rritje të lehtë në sesionin e sotëm, ndërsa një ditë më parë realizuan fitimet më të mëdha ditore, në thuajse një vit. Indeksi pan-Europian Stoxx 600 po qëndron në rritje të lehtë me 0.2%, ndërsa sektori i kujdesit shëndetësor realizon fitimet më të mëdha, në rritje me 0.9%. Në anën tjetër, kompanitë e produkteve shtëpiake kryesojnë humbjet, në rënie me 1.9%.

Humori i investitorëve u përmirësua ndjeshëm në sesionin e kaluar, pasi dy zyrtarë të Rezervës Federale deklaruan se rritja e yield-it të obligacioneve mund të reduktojë nevojën e rritjes së interesave nga banka qendrore. Gjithashtu, investitorët globalë po monitorojnë nga afër zhvillimet e përgjakshme në luftën mes Izraelit dhe Hamasit.

Për këtë arsye, më herët gjatë javës investitorët preferuan asetet e sigurta, ku bën pjesë ari, dollari amerikan dhe bonot e thesarit. Ditën e sotme, investitorët po presin edhe të dhënat mbi Indeksin e Çmimeve Konsumatore në SHBA dhe analistët parashikojnë një rritje me 0.3%.

Për sa i përket korporatave, prodhuesi gjerman i këpucëve, Birkenstock po përgatitet për tu listuar në bursën e Nju Jorkut, ndërsa në Ofertën Publike Fillestare do të ofrojë një çmim prej 46 dollarë për aksion. Në anën tjetër, kompania franceze e produkteve të luksit, LVMH, raportoi një ngadalësim të të ardhurave në tremujorin e tretë të këtij viti dhe për 9-mujorin.

Lidion Kulla / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.