Sezon turistik rekord për Kroacinë – Arsyeja kryesore, hyrja e vendit në zonën Shengen

Zyrtarët kroatë të sektorit të turizmit po parashikojnë një vit rekord për sektorin pasi vendi iu bashkua zonës së lëvizjes së lirë Shengen në janar, duke rritur numrin e vizitorëve në bregdetin e saj piktoresk të Adriatikut.

Turizmi përbën 20% të ekonomisë së Kroacisë dhe pas një rënieje gjatë pandemisë COVID-19, sektori u rikuperua në vitin 2022 dhe bazuar në rezultatet në sezonin para verës, zyrtarët presin që trendi pozitiv të vazhdojë edhe këtë vit.

Shoqata turistike kroate saktëson se deri më tani, janë regjistruar rreth 5 milionë ardhje dhe mbi 17.5 milionë fjetje, që është një rritje prej 20% nga viti i kaluar. Qëndrimet gjatë natës u rritën me 11% krahasuar me vitin 2019, i cili ishte një vit rekord për vizitorët.

Sektori grumbulloi të ardhura rekord prej mbi 13 miliardë euro në vitin 2022, ndërsa këtë vit priten më shumë të ardhura.

Anëtari i BE-së, Kroacia u bashkua me zonën Shengen si dhe në zonën e euros më 1 janar, duke u mundësuar vizitorëve nga blloku të udhëtojnë më shpejt dhe pagesa më të lehta.

Zyrtarët shohin një prirje të re të më shumë turistëve të fundjavës nga vendet fqinje si një efekt të drejtpërdrejtë të anëtarësimit të Kroacisë në zonën Shengen. Ata pranojnë se vendi nuk ka qenë asnjëherë më afër tregjeve kryesore si Sllovenia, Italia, Hungaria, Austria dhe Bavaria, nga ku kanë mbërritur numri më i madh i vizitorëve në periudhën parasezonale.

Megjithatë, në qytetin historik të Zadarit, i cili është i rrethuar nga parqe kombëtare dhe mbetjet e qytetit të vjetër të të cilit janë një trashëgimi e mbrojtur nga Kombet e Bashkuara, vendasit që japin me qira pronat e tyre turistëve ankohen për strategjinë e dobët të investimeve të qeverisë, duke përmendur mungesën e hoteleve dhe një aeroport më të madh.

Dorina Kurtaj / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.