Shqipëria ‘hua shtesë’ Fondit Saudit për Zhvillim – Rreth 45 milion euro për ndërtimin e rrugës Tiranë–Elbasan–Qukës–Qafa e Plloçës

Nëpërmjet një njoftimi të publikuar në Fletoren Zyrtare, bëhet me dije se është ratifikuar marrëveshja e huas ndërmjet Këshillit të Ministrave të Republikës së Shqipërisë dhe Fondit Saudit për Zhvillim, për projektin e ndërtimit të rrugës Tiranë–Elbasan–Qukës–Qafa e Plloçës si “Hua shtesë”, sipas tekstit që i bashkëlidhet këtij ligji dhe është pjesë përbërëse e tij.

Referuar njoftimit, Fondi bie dakord t’i japë hua Huamarrësit, në bazë të termave dhe kushteve të përcaktuar në Marrëveshjen e Huas ose të referuara për një Hua në një shumë prej njëqind e tetëdhjetë e tre milionë e shtatëqind e pesëdhjetë mijë (183,750,000) rialë sauditë të cilat kapin vlerën e rreth dyzet e pesë milion eurove (45.072.594).

Huamarrësi do të paguajë një tarifë huaje në normën prej dy përqindësh (2%) në vit mbi shumën e principalit të Huas së tërhequr dhe të papaguar.

Tarifa e Huas dhe tarifa të tjera, nëse ka, janë të pagueshme çdo gjashtë muaj në datat 15 mars dhe 15 shtator në çdo vit.

Afati i Huas është njëzet e pesë vjet, duke përfshirë një periudhë pesëvjeçare mospagimi. Ky ligj hyn në fuqi 15 ditë pas botimit në Fletoren Zyrtare.

N.Xh / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.