Shqipëria, kampione e udhëtimeve për puljezët – E ardhmja e marrëdhenieve mes porteve në Adriatikun e poshtëm

60% e pasagjerëve që udhëtojnë nga porti i Barit në Itali drejt Shqipërisë, 80% e tyre drejt portit të Durrësit dhe pjesa tjetër në Vlorë dhe Sarandë. Duke regjistruar mbi 1 milion pasagjerë që prej vitit 2010, një trend gjithmonë në rritje. Vetëm në itinerarin Bari-Durrës nga 56.344 pasagjerë qe u regjistruan ne vitin 2017, vitin e kaluar u numëruan 79.905 pasagjerë. Ndërkohë, qe udhëtimet nga portet e Adriatikut të poshtëm italian drejt porteve të Malit të Zi kane shënuar ulje, ato vitin e kaluar zunë 3-4% të volumit të udhëtimeve detare.

Por, rritje me 80-90% në vit ka shënuar edhe trafiku ajror i pasagjerëve, rritje që ka kompensuar humbjet me Malin e Zi. Këto të dhëna janë theksuar në konferencën e zhvilluar në Bari mbi të ardhmen e marrëdhënieve mes porteve në Adriatikun e poshtëm, pjese e projektit të Bashkimit Europian, Interreg, që përfshin tre vende; Italinë, Shqipërinë dhe Malin e Zi dhe synon krijimin e një eurokrahine, duke futur edhe Maqedoninë e Veriut, Kroacinë, Bullgarinë etj, si një urë thithjeje e investimeve dhe zhvillim të rajonit.

“Projekti lind nga një kontekst historik që na e mëson Perandoria Romake, kohë në të cilën zhvillimi lulëzoi në çdo cep të kësaj perandorie, pikërisht falë ndërtimit të rrugëve edhe në provincat më të largëta. Komunikim do të thotë shkëmbim, do të thotë pasuri e zhvillim. Jemi duke punuar për këtë. Projekti konkretisht ka krijuar harmonizim e lehtësim të procedurave portuale në të gjithë portet e Puljas, të cilat shkëmbejnë informacion me portet e Durrësit në Shqiperi, portin e qytetit të Barit në Malin e Zi dhe po synojmë të përfshijmë edhe Bullgarinë dhe Maqedoninë e Veriut. Kemi pajisur këto porte me mjete për regjistrimin e shpejtë të pasagjerëve”, u shpreh Massimo Lupis D’Urso, Koordinator i Task Forcës Ndërkombëtare ASSET, Krahina Pulja.

“Sot jemi duke i paraprirë së ardhmes, pasi me hyrjen e Shqipërisë dhe Malit të Zi në Bashkimin Europian këto flukse do shtohen më shumë. Pulja gjithmonë ka qenë e vëmendshme ndaj Shqipërisë, ka qenë një tokë mikpritëse, por sidomos vitet e fundit shkëmbimet ekonomike mes dy vendeve janë shtuar në mënyrë të jashtëzakonshme. Mjafton të kujtojmë numrin e turistëve vitin e fundit dhe ndërmarrjet italiane të transferuara në Shqipëri. Ne si Krahinë e Puljas jemi përqendruar fort te infrastruktura. Shqipëria po investon fort në infrastruktura të mëdha; porte, aeroporte, e dimë këtë. Ne po përpiqemi të përmirësojmë me shërbime më cilësore strukturat që tashmë i kemi”, tha Giuseppe Garofalo.

Ada Hazizolli / SCAN

 

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.