Shqipëria, Kryeqendra e Eventit Botëror mbi Turizmin – Rama: “Shtëpia e Shqiptarit është e Mikut”

Në Shqipëri po mbahet për herë të parë Takimi i 70-të i Komisionit për Europën të Organizatës Botërore të Turizmit. Për tre ditë radhazi, Shqipëria do të jetë kryeqendra e eventit botëror mbi turizmin që do të bëjë bashkë politikëbërës, sipërmarrës në fushën e turizmit dhe përfaqësues të agjencive të rëndësishme ndërkombëtare.

Në mbledhjen e sotme, Kryeministri Edi Rama tha se Shqipëria duhet të mësojë nga gabimet që kanë bërë vendet e tjera të OBT-së, me qëllim që të mos përsëriten. Ai theksoi arritjet e Shqipërisë në turizëm duke e lidhur me shprehjen e Lekë Dukagjinit se “Shtëpia e Shqiptarit është e Mikut”.

Ndërkohë, Ministrja Kumbaro theksoi se Shqipërinë e kanë vizituar rreth 10.1 milionë turistë gjatë vitit të kaluar duke shënuar shifra rekord sa i takon turizmit. Sipas Barometrit të Organizatës Botërore të Turizmit, vendi ynë është renditur mes 5 vendeve të para për numrin e lartë të vizitorëve. Objektiv i këtij viti do të jetë rritja e mëtejshme e këtyre shifrave dhe pozicionimi i Shqipërisë në krye të kësaj liste si ndër aktraksionet turistike më të vizituara të momentit, deklaroi Kumbaro.

Shqipëria do të jetë Kryeqyteti Mesdhetar i Kuluturës dhe Dialogut për 2025-ën dhe pritet që brenda vitit të ardhshëm të zhvillojë Panairin Kombëtar të Turizmit.

Sekretari i Përgjithshëm i Organizatës Botërore të Turizmit përgëzoji Shqipërinë për arritjet e deritanishme, produkt i një përkushtimi dhe një pune tepër të madhe. Sipas tij, sukseset kryesore në këtë rajon do të vijnë prej turizmit duke inkurajuar edhe kompanitë e huaja që të investojnë në vendin tonë.

Në kuadër të këtij takimi, nesër do të mbahet edhe një Konferencë për Investimet në turizëm, gjatë së cilës do të prezantohet përmes një ceremonie zyrtare udhëzuesi i investimeve në këtë sektor.

Ledina Elezi/SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.