Shumë vapë për pushime? Si Europa po rivlerëson industrinë e saj të turizmit!

Industria e turizmit, e cila jep një kontribut të rëndësishëm në produktin e brendshëm bruto të Europës, mund të ekspozohet ndaj ngarkesave të konsiderueshme për shkak të ndryshimeve klimatike. Ky supozim është më shumë se një frikë e thjeshtë, pasi mbështetet nga një studim i Komisionit të BE-së me fakte dhe shifra.

Kjo mund të godasë fort kontinentin në perspektivë, veçanërisht pasi valët e fundit të të nxehtit me temperatura rreth dhe madje mbi 40 gradë Celsius në rajonin e Mesdheut kanë shkaktuar pasiguri të madhe në lidhje me shifrat e prenotimeve.

Spanja, Italia dhe Greqia janë ndër vendet e BE-së, ekonomitë e të cilave janë veçanërisht të orientuara drejt sektorit të turizmit.

Studimi i Komisionit të BE-së u krye nga David Garcia León, Analist për Ndikimet Klimatike dhe Politikat e Përshtatjes në Komisionin Europian. Ai gjeti një model të qartë veri-jug të ndryshimit të kërkesës turistike për Europën, me rajonet veriore që përfitojnë nga ndryshimet klimatike dhe rajonet jugore që përballen me një rënie të ndjeshme të kërkesës për turizëm.

Europa është ende rajoni më i vizituar në botë, sipas përllogaritjeve të Organizatës Botërore të Turizmit (UNWTO). Në vitin 2020, kontinenti gjeneroi 41 % të të gjitha të ardhurave botërore nga turizmi dhe regjistroi 51 % të të gjitha ardhjeve ndërkombëtare – ekuivalente me 582 milionë turistë.

Sipas Komisionit Europian të Udhëtimit (ETC), një organizatë joqeveritare që promovon Europën si një destinacion udhëtimi në mbarë botën, tregu europian i udhëtimeve është në rritje. Për sa i përket numrit të udhëtarëve që mbërrijnë në Europë, ky vit tashmë ka arritur në 95 % të totalit të vitit 2019, thotë ETC.

Kërkesa e lartë e konsumatorit po ngec pavarësisht inflacionit kokëfortë dhe rritjes së kostove të udhëtimit. Kjo edhe për shkak të pushuesve nga SHBA, të cilët po përfitojnë nga kursi i favorshëm i këmbimit. Sipas të dhënave të ETC, Portugalia (+79%), Turqia (+78%) dhe Mali i Zi (+43%) po përjetojnë rritje veçanërisht të mëdha të turistëve nga SHBA.

Në përgjithësi, prirja është drejt vendeve që thuhet se ofrojnë vlerë të mirë për para. Vlerësimet e Komisionit Europian të Udhëtimit deri në maj 2023 kanë treguar se nga ky reputacion përfitojnë veçanërisht katër vende: Serbia (me rritje prej 27% në vitin aktual), Bullgaria (+21%), Mali i Zi (+12%) dhe Turqia (+9%).

Edel Strazimiri / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.