Si do “renditen” konsumatorët e mëdhenj të energjisë – Formula/ Përveç energjisë elektrike, përfshihen edhe karburantet, drutë e mbetjet

Kategorizimi si konsumator i madh energjie nuk do përfshijë vetëm energjinë elektrike, por edhe burimet e tjera sikurse është benzina, nafta, drutë, mazuti, torfa, mbetjet, peleti, etj. Gjithçka përcaktohet në një udhëzim të Ministrisë së Infrastrukturës dhe Energjisë, të miratuar në fillim të vitit, por që sapo është publikuar në Fletoren Zyrtare duke hyrë në fuqi. Sipas legjislacionit në fuqi, konsumator i madh energjie konsiderohet çdo abonent që konsumon çdo vit mbi 1 mln kWh energji.

Ndërkohë që, udhëzimi përmban tabelën e konvertimit për çdo lëndë energjetike të zgjedhur për përodrim final. Sasia e naftës apo benzinës matet me kilogram e jo në litra sipas dokumentit e më konkretisht 1 kg benzinë është e barabartë me 12,222 kWh energji, ndërsa 1 kg naftë konvertohet në 11,750 kWh energji.  Ndërkaq, sipas udhëzimit Agjencia për Eficiencën e Energjisë do të marrë informacion dhe të dhëna lidhur me konsumin final të energjisë dhe konsumin e të gjitha llojeve të energjive nga: personat fizikë ose juridikë privatë që zhvillojnë një aktivitet ekonomik ose social dhe konsumojnë energji, si dhe institucionet shtetërore qendrore dhe vendore që konsumojnë energji.

Kategorizimi si konsumator i madh energjie mbart një sërë detyrimesh për këta abonentë, pasi sipas legjislacionit në fuqi ata janë të detyruar të auditohen nga pikëpamja energjetike, si dhe të hartojnë e zbatojnë planet e eficiencës së energjisë, me qëllim reduktimin e konsumit. Sipas të dhënave zyrtare, aktualisht numërohen 175 konsumatorë të mëdhenj energjie, duke përfshirë institucione publike sikurse janë ujësjellësit, spitalet, burgjet, etj., por edhe konsumatorë privatë.

Ola Mitre / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.