Si i zhvlerësoi euro importet? – 7-mujori/ Vendoset rekordi i 5 viteve në sasi. Bie vlera e tyre

Zhvlerësimi i euros kundrejt monedhës kombëtare përgjatë këtyre muajve i ka bërë importet më të lira, kjo shoqëruar edhe me një rënie të përgjithshme të inflacionit, gjë që ka ndikuar negativisht në të ardhurat e vjelura nga doganat.

Të dhënat zyrtare të Drejtorisë së Përgjithshme të Doganave, të analizuara nga SCAN TV japin një  pasqyrë të saktë të situatës. Kështu, referuar treguesve, 7-mujori 2023 regjistron sasinë më të lartë të produkteve të importuara nga jashtë krahasuar me të njëjtën periudhë të 5 viteve të fundit, ku volumi arriti në 3.4 milionë ton, me një rritje të konsiderueshme edhe me një vit më parë, ku u importuan 3 milionë ton.

Por sasia ne rritje e mallrave të importuara, jo vetëm që nuk ka prodhuar vlerë më të lartë, siç duhet të ishte normalisht, por ka ndodhur tërësisht e kundërta. Sipas të dhënave të doganave, rezulton se përgjatë periudhës Janar-Korrik 2023, vlera e importeve regjistrohet ne 510 miliardë lekë, me një rënie të konsiderueshme në raport me 7 mujorin 2022, me afro 18 miliardë lekë.

Duket se situata e kursit të këmbimit është shfrytëzuar nga bizneset importuese për të blerë më shumë sasi dhe rrjedhimisht për të përfituar më shumë duke qenë se në tregtinë  e brendshme nuk është vënë re ndonjë rënie domethënëse e çmimeve. Nga ana tjetër rënia e importeve në vlerë është përkthyer në më pak të ardhura të mbledhura nga doganat përgjatë kësaj periudhe.

Nëse do të analizonim ecurinë e kursit, mesatarja në 7 muaj e këmbimit euro/lekë rezulton në 112, ndërsa gjatë vitit të kaluar ishte 120.8.  Muaji Korrik 2023 ka regjistruar vlerën më të ulët të gjithë vitit ku 1 euro është këmbyer me 104.69 lekë.

Elisabeta Dosku/ SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.