Strategjia e re e Perëndimit për shkëputjen nga Kina – Investimet transferohen diku tjetër, prodhim vetëm për konsum të brendshëm

Kompanitë perëndimore po ndërmarrin iniciativa për shkëputjen e tyre të rregullt nga ekonomia kineze. Në sfondin e rritjes së tensioneve tregtare dhe gjeopolitike midis Pekinit dhe Perëndimit, gjigantët ndërkombëtarë po izolojnë gradualisht veprimtaritë e tyre në Kinë, me qeveritë që miratojnë të ashtuquajturën strategji të heqjes së rrezikut. Termi që ka zëvendësuar konceptin e shkëputjes radikale është një shenjë se Perëndimi tani po ndjek një qasje më pak konkurruese për marrëdhëniet e tij me Kinën, por biznesi, megjithatë, ata ende nuk kanë formuluar strategji të qarta, sipas analistëve. Ndërsa një numër i vogël kompanish, synojnë të ndalojnë fare prodhimin në Kinë, shumica dërrmuese janë ende duke ‘peshua’r opsionet e tyre, të cilat variojnë nga deinvestimi deri tek afrimi.

Bllokimet pandemike të Pekinit dhe sulmi i Moskës ndaj Ukrainës kanë rritur ndjesinë e urgjencës pasi liderët perëndimorë shqetësohen për dominimin e Kinës në zinxhirët kryesorë të furnizimit, potencialin për konflikt mbi Tajvanin dhe armiqësinë tregtare të Pekinit.

Tashmë ka shenja të ndryshimeve në prodhim. Një raport i Dhomës Europiane të Tregtisë në Kinë zbuloi se 11% e kompanive europiane të anketuara kishin rialokuar tashmë investimet jashtë Kinës, ndërsa 22% kishin planifikuar të bënin të njëjtën gjë. Dhoma Amerikane e Tregtisë në Kinë zbuloi se 12% e grupeve amerikane të anketuara konsideruan zhvendosjen e burimeve të tyre jashtë Kinës, ndërsa 12% të tjerë e kanë bërë tashmë këtë.

Apple dhe Intel po investojnë në vende të tjera, përfshirë Indinë, ndërsa mbajnë fabrika në Kinë, në një strategji mbrojtëse të njohur si “Kina plus një”. Por strategjia më e studiuar është “Kina për Kinën”, ku veprimet e Kinës riorganizohen për të prodhuar mallra vetëm për konsum të brendshëm, siç po bën tashmë kompania farmaceutike anglo-suedeze Astra Zeneca. Kjo strategji përfshin gjithashtu identifikimin e zinxhirëve të furnizimit.

Shoqata Gjermane e Inxhinierisë – VDMA ka zbuluar se më shumë se një e treta e anëtarëve të saj janë në kërkim të furnizuesve alternativë në mënyrë që të mund t’i shërbejnë tregjeve amerikane dhe kineze me produkte “neutrale”. Ndërsa Volkswagen, i cili mbështetet në Kinë për rreth gjysmën e fitimeve të saj, njoftoi 4 miliardë euro investime në vend vitin e kaluar, në një lëvizje që do t’i japë Kinës më shumë autonomi dhe fuqi vendimmarrëse.

Më në fund, firmat e konsulencës, si McKinsey dhe Boston Consulting Group, janë ndër kompanitë që po ndajnë sistemet e tyre kineze IT. Ky është rezultat i ligjeve gjithnjë e më të rrepta kundër spiunimit dhe mbrojtjes së të dhënave, që do të thotë se kompanitë kërkojnë miratim rregullator për të transferuar sasi të mëdha të dhënash jashtë Kinës.

Dorina Kurtaj /SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.