Taksa e karbonit shtyhet në 1 Korrik 2026 – Ndryshon niveli. Aplikimi fillon me 1.5 lekë/kg, nga 0.5 lekë/kg që ishte propozimi fillestar

Vendosja e taksës së karbonit të parashikuar në paketën fiskale të vitit të ardhshëm për industrinë që përdor qymyrin si lëndë djegëse, si ajo e çimentos dhe çelikut, do të shtyhet për në 1 korrik të 2026-ës, duke iu lënë kohë kompanive që të bëjnë investime në drejtim të përdorimit të burimeve alternative.

Vendimi është marrë gjatë diskutimit të buxhetit dhe paketës fiskale 2024 në Komisionin e Ekonomisë, por me kushtin që shtyrja e afatit të kompensohet me rritjen e nivelit të taksës së karbonit mbi qymyrin në 1.5 lekë/ kg nga 0.5 lekë/kg që ishte propozuar fillimisht.

Bashkimi Europian, më 10 maj 2023, ka miratuar një rregullore, që parashikon aplikimin e një mekanizmi të rregullimit të kufirit të karbonit duke përcaktuar taksimin e importeve drejt vendeve anëtare nga shtete që nuk aplikojnë, ose aplikojnë një taksë të ulët karboni në tregun e tyre të brendshëm krahasuar me nivelet e taksimit në vendet e Bashkimit Europian.

Elisabeta Dosku/ SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.