Tkurret ekonomia e Britanisë – Në vitin 2023 inflacioni do të jetë i lartë dhe ngadalësimi 0.4%

Ekonomia e Britanisë është në rrugën e tkurrjes prej 0.4% vitin e ardhshëm, pasi inflacioni do të vazhdojë të qëndrojë i lartë dhe sipërmarrjet ende nuk po vendosin për investimet e tyre. Konfederata e Industrisë së Biznesit në vend parashikoi se situata do të japë pasoja të zymta për rritjen afatgjatë.

Kreu i kësaj të fundit, Toni Danker u shpreh se Britania aktualisht është në stagflacion. Dhe pse kompanitë shohin mundësi rritjeje, të dhënat po i detyrojnë të pezullojnë çdo investim për vitin 2023.

Parashikimi i konfederatës së industrisë së biznesit konfirmon një ulje të theksuar nga parashikimi i saj i fundit prej 1% për vitin 2023 dhe nuk pret që produkti i brendshëm bruto të kthehet në nivelin para Covid deri në mesin e vitit 2024.

Ekonomia e vendit është goditur rëndë nga një rritje e çmimeve të gazit natyor oas pushtimit rus të Ukrainës, si dhe nga rimëkëmbja jo e plotë e tregut të punës pas pandemisë së Covid 19 dhe investimeve e prodhimit të dobët në mënyrë të vazhdueshme. Papunësia pritet tërritet në 5% në fund të 2023-shit dhe në fillim të 2024-ës nga 3.6% që është aktualisht.

Inflacioni në Britani arriti nivelin më të lartë të 41 viteve prej 11.1% në muajin tetor, duke vënë nën presion të madh kërkesën e konsumatorit, dhe sipas parashikimeve ai do të ketë një rënie të ngadaltë duke arritur në një mesatare prej 6.7% vitin e ardhshëm dhe 2.9% në vitin 2024.

Parashikimi i konfederatës së industrisë së biznesit është në përputhje me atë të organizatës për bashkëpunim dhe zhvillim ekonomik – OECD – e cila pret që Britania të jetë ekonomia më e dobët e Europës vitin e ardhshëm.

Për këtë arsye ajo i bëri thirrje qeverisë që të bëjë me fleksibël sistemin e vizave të punës të Britanisë pas Brexit, dhe t’i japë fund asaj që ajo e sheh si një ndalim efektiv për ndërtimin e turbinave me erë në tokë.

Dorina Kurtaj / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.