Tregjet europiane zgjerojnë fitimet – Mbështetet nga vendimi i Britanisë për të rishikuar planin e uljes së taksave
Bursat europiane janë hapur në rritje edhe në sesionin e sotëm, pas kthesës 180 gradë të qeverisë britanike në lidhje me të ashtuquajturin “mini buxhet”. Shumica e sektorëve janë në territor pozitiv, ndërsa sektori i ndërtimit realizon fitimet më të mëdha, në rritje me rreth 1.3%. kryeministrja britanike, Liz Truss kërkoi falje për gabimet e bëra në 6 javët e para në këtë detyrë.
Indeksi pan-Europian STOXX 600 e ka nisur ditën në rritje me 0.7%. Në fokus të tregjeve do të jetë sërish Britania e Madhe, pasi Banka e Anglisë mund t’i rikthehet programit të lehtësimit sasior, sikurse bëri deri më 14 tetor, duke blerë sasi të pakufizuara të paundit, për të stabilizuar fondet e pensioneve private.
Në vëmendje të investitorëve do të jenë edhe fitimet tremujore të korporatave në SHBA dhe në Europë. Edhe Wall Street u rrit ndjeshëm sesionin e kaluar, ndërsa bursat në rajonin e Azi-Paqësorit vijuan me tendencën pozitive. Gjatë ditëve të fundit, fitimet më të mëdha po i realizon sektori i telekomunikacioneve.
SCAN
Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.