Tregu monetar e nis javën në qëndrueshmëri – “Ngecin” bisedimet për rritjen e tavanit të borxhit në SHBA
Tregu monetar e ka nisur në qëndrueshmëri këtë javë, pas ngërçit në bisedimet për rritjen e tavanit të borxhit në SHBA dhe komenteve të shefit të Rezervës Federale, Jerome Powell për të ngadalësuar hapin e rritjes së interesave. Euro po këmbehet në rreth 1.08 dollarë, shumë pranë nivelit më të ulët në 7 javët e fundit. Tashmë, investitorët po presin takimin mes presidentit amerikan, Joe Biden dhe Spikerit të Dhomës së Përfaqësuesve, republikanit Kevin McCarthy, të cilët do të diskutojnë detajet e fundit për rritjen e tavanit të borxhit.
Negociatat mes të dyja palëve u ndërprenë të premten, me negociatorët republikanë që u larguan nga takimi. Megjithëse bisedimet filluan sërish, asnjëra nga palët nuk përmendi ndonjë progres. Ndërkohë, presidenti i Rezervës Federale, Jerome Powell, deklaroi të premten në një konferencë në Uashington se shtrëngimi i kushteve të kreditimit mund të nënkuptojë se nuk ka nevojë për të rritur më tej normat e interesit.
Megjithatë, Powell përsëriti se vendimet do të merren takim pas takimi. Indeksi që mat ecurinë e dollarit amerikan, përballë shportës me 6 monedhat kryesore ndërkombëtare po qëndron në rreth 103, ndërsa javën e kaluar u rrit deri në 103.6, niveli më i lartë që nga 20 marsi. Në tregun e kriptomonedhave, bitcoin po tregtohet në rreth 26,800 dollarë, ndërsa ethereum po tregtohet në rreth 1810 dollarë.
SCAN
Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.