Nafta e nis javën në rënie me rreth 1% – Investitorët, të shqetësuar për ngadalësimin e kërkesës

Nafta po qëndron në rënie të ndjeshme në sesionin e parë të kësaj jave, për shkak të shqetësimeve mbi bisedimet për rritjen e tavanit të borxhit në SHBA dhe shenjave për ngadalësimin e kërkesës në Kinë. Këto zhvillime kanë zbehur uljen e prodhimit nga Kanadaja dhe nga vendet e OPEC+.

Nafta Brent e Londrës po tregtohet në rreth 75 dollarë për fuçi, ndërsa nafta Bruto amerikane po tregtohet në rreth 71 dollarë për fuçi. Rifillimi i negociatave për tavanin e borxhit në SHBA, më vonë gjatë ditës së sotme do të përcaktues për ecurinë e çmimeve të naftës. Investitorët janë të shqetësuar se, rimëkëmbja e kërkesës në Kinë po ngadalësohet, referuar disa të dhënave ekonomike gjatë dy javëve të fundit.

Javën e kaluar, të dyja kontratat fituan mbi 2% të vlerës, fitimet e para javore në 5 javët e fundit. Ndërkohë, në takimin e fundjavës vendet e G7-ës u angazhuan për të rritur sanksionet ndaj Rusisë, sidomos duke shënjestruar eksportet e naftës. Megjithatë, analistët shprehen se këto masa nuk pritet të ndryshojnë situatën e furnizimit të tregut. Në tregun e metaleve të çmuara, ari po tregtohet në rreth 1980 dollarë për onz, ndërsa argjendi po tregtohet në rreth 23.9 dollarë për onz.

SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.