Tremujori III, rritet risku i kursit të këmbimit të borxhit publik – Në rënie dy komponentët e tjerë, rreziku nga normat e interesit dhe ai i rifinancimit

Megjithëse ka ulur ndjeshëm huamarrjen në tregjet financiare ndërkombëtare, Ministria e Financave sheh në rritje të ndjeshme rrezikun e kursit të këmbimit sa i përket borxhit të jashtëm. Në analizën që i bën risqeve të borxhit, Ministria e Financave vlerëson në rënie dy komponentët e tjerë të rreziqeve që mund të cënojnë treguesit e borxhit publik, riskun e rifinancimit dhe riskun e normave të interesit, duke vlerësuar në rritje vetëm riskun e kursit të këmbimit.

Në dokumentin ku analizon treguesit e riskut, Ministria e Financave vlerëson në 46.2% riskun e kursit të këmbimit për tremujorin e tretë të këtij viti. Dy tremujorët e mëparshëm, risku i kursit të këmbimit për borxhin në valutë të huaj vlerësohej në 46.2%. Për vitin 2022, treguesi i riskut të kursit të këmbimit ishte 46.8%. bie në sy që Ministria e Financave e llogarit vlerën e borxhit të jashtëm me kursin 106.63 lekë në raport me monedhën evropiane. Për vitin 2022, llogaritjet bëhen me vlerën e euros 114.23 lekë.

E kundërta ka ndodhur me dy komponentët e tjerë, riskun e rifinancimit, si dhe riskun e normave të interesit, që të dy të llogaritur për portofolin e Borxhit të Brendshëm të Qeverisë Qendrore Buxhetore. Treguesi i riskut të financimit ka rënë në 47.6% nga përkatësisht 50.9% dhe 51.9% për dy tremujorët e mëparshëm. Po ashtu, për tremujorin e tretë të vitit ka rënë në 48.4% treguesi i riskut të normave të interesit nga përkatësisht 51.8% dhe 52.9% në dy tremujorët e mëparshëm.

Aktualisht, për nëntë muajt e parë të vitit, totali i borxhit publik të shtetit shqiptar rezulton 1,39 trilionë euro. I matur në raport me Produktin e Brendshëm Bruto, Borxhi publik rezulton sa 64.01 % e PBB-së. Borxhi i jashtëm për nëntëmujorin raportohet nga Ministria e Financave sa 29.53% e Produktit të brendshëm Bruto, në rënie të fortë krahasuar me vitin e shkuar, kur ishte sa 30.2% e PBB-së.

Lorenc Rabeta/SCAN

 

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.