Turizmi ul papunësinë në Greqi – Punësime të reja dhe rënie e pushimeve nga puna

Të dhënat e papunësisë së regjistruar në baza mujore nga Shërbimi Publik i Punësimit në Greqi tregojnë për rekrutime masive , kryesisht në sektorët e turizmit dhe ushqimit, por edhe një ulje e ndjeshme e pushimeve nga puna gjatë muajit të kaluar prill. Fillimi i lëvizjes turistike duket se është shoqëruar me punësime të konsiderueshme. Të papunët u ulën në 927.793, duke shënuar një rënie prej 7.1% (70529 të papunë më pak) krahasuar me muajin korrespondues të vitit të kaluar. Ulja arrin në 107787 persona (-10.4%), nëse krahasimi bëhet me muajin paraardhës, mars. Megjithatë, siç vlerësojnë zyrtarët e sektorit, ka pasur edhe ulje drastike të numrit të të papunëve, pra më pak pushime nga puna. Kështu shpjegohet ulja e madhe e të papunëve të subvencionuar, sidomos atyre që ishin të punësuar në sektorë me natyrë sezonale.

Kështu, në muajin prill të papunët e subvencionuar ishin vetëm 55.438, një numër ky i reduktuar me 139.927 krahasuar me një muaj më parë (-71.6%), por edhe me 92.627 ( – 62.6%) krahasuar me prillin 2022. Kjo ka sjellë si pasojë rënien e të papunëve të subvencionuar, shumë më poshtë se 10% e totalit të të papunëve dhe konkretisht përbën vetëm 5.9% të të regjistruarve. Në fakt, të dhënat tregojnë se vetëm 14.749 të papunë të subvencionuar vijnë nga sektori i turizmit (26.6% e totalit), një rënie prej 43.609 personash krahasuar me një muaj më parë, prill 2023.

Pavarësisht rënies së papunësisë, gati gjashtë në dhjetë persona të papunë kanë qenë jashtë tregut të punës për më shumë se 12 muaj.

Ky imazh jashtëzakonisht pozitiv i tregut të punës, me rekrutimet e shumta dhe reduktimin e largimeve nga puna, pritet të përmirësohet shumë më tepër, nisur nga të dhënat zyrtare, sipas të cilave më 16 maj numri i të papunëve të regjistruar kishte rënë në 858.321 persona.

Sa i përket të dhënave cilësore që rezultojnë nga papunësia e regjistruar, më të prekura mbeten femrat pasi ato arrijnë në 602.814, që korrespondon me një përqindje prej 65% krahasuar me 324.979 meshkuj (35.0%). Gjithashtu, 32.9% e të papunëve i përkasin grupmoshës 30 – 44 vjeç. Pothuajse gjysma e të papunëve të regjistruar, përkatësisht 47.4% ose 439.670 kanë të përfunduar arsimin e mesëm.

Dorina Kurtaj / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.