Udhëtime pa pagesë për 30 ditë në Europë – BE po jep 38 mijë bileta treni falas! Cilët janë kriteret?

Të udhëtosh me tren nëpër Europë një herë në jetë – për shumë të rinj por edhe më të moshuar është mishërimi i vetë lirisë. 38.000 të rinj europianë kanë tani mundësinë të fitojnë një biletë falas për të udhëtuar me tren në të gjithë kontinentin edhe një herë.

Komisioni Europian ka njoftuar fillimin e raundit të ardhshëm të programit të udhëtimit “DiscoverEU”, ku mund të marrin pjesë qytetarët e vendeve të BE-së, si dhe të rinjtë nga Islanda, Lihtenshtajni, Maqedonia e Veriut, Norvegjia, Turqia dhe Serbia. Deri tani nuk ka ndonjë shpjegim pse shtetasit e vendeve të tjera të Ballkanit Perëndimor nuk janë përfshirë në këtë projekt.

Të rinjtë mund të aplikojnë për bileta deri më 18 tetor në orën 12:00, njoftoi Komisioni në Bruksel.

Kushdo që dëshiron të fitojë një biletë falas, fillimisht duhet të demonstrojë njohuritë e tij në një kuiz të shkurtër. Fituesit mund të udhëtojnë nëpër Europë deri në 30 ditë midis 1 marsit 2024 dhe 31 majit 2025.

Programi është i dedikuar për të rinjtë e moshës 18 vjeç e lart. Më saktësisht, të gjithë të lindurit nga 1 janari deri më 31 dhjetor 2005 mund të marrin pjesë. Pjesëmarrësit me aftësi të kufizuara ose probleme shëndetësore mund të sjellin një shoqërues me vete.

Iniciativa “DiscoverEU” filloi në vitin 2018 dhe ishte ideja e aktivistëve Vincent-Immanuel Herr dhe Martin Speer. Propozimi i tyre për t’i dhënë çdo qytetari të BE-së një biletë Interrail për ditëlindjen e tyre të 18-të dhe për t’i prezantuar ata në kontinent në këtë mënyrë u përmbush.

E . S / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.