“Ujësjellësit, fluks aplikimesh për tarifa të rregulluara të energjisë” – Parashikimet e ERRU-së pas reformës: Shtrenjtimi i çmimit rriti 38% kostot e operimit

Përfundimi i riorganizimit të sektorit të ujësjellës-kanalizimeve pritet të pasohet me një fluks aplikimesh për tarifa të rregulluara të energjisë elektrike”. Kjo, sipas Entit Rregullator të Ujit, që ka analizuar ecurinë e ndryshimit të kostove për energji elektrike, pas rritjes së çmimeve me 70% vitin që shkoi. Ndërkohë që, kjo situatë ka sjellë edhe rënien e një prej trguesve të perfomancës së këtyre shoqërive, që është mbulimi i kostove të operimit dhe mirëmbajtjes.

Sipas ERRU-së, shtrenjtimi i energjisë në këtë nivel, që është një prej zërave më të rëndësishëm të kostove të aktivitetit UK, duhet të reflektohej në rritje të nivelit të tarifave për shërbimet e ofruara. “Por koha e shkurtër në dispozicion dhe paqartësia në ecurinë e çmimeve në treg, akoma nuk ka bërë të mundur të përcaktohet përfundimisht në nivel qendror politika për çmimin e energjisë elektrike për sektorin e UK.

Rrjedhimisht subvencionimi i shoqërive ka qenë i nevojshëm edhe për vitin 2022”, – vlerëson ERRU, duke shtuar se për shkak të rritjes së çmimit të energjisë elektrike, nga 11.5 lekë/ kËh në 18.8 lekë/kwh kostot e ujësjellësve për energjinë elektrike u rritën me 38% apo 1.1 miliard lekë shumë.

Reforma në ujësjellës nisi vitin që shkoi, ndërsa synon bashkimin e 58 ndërmarrjeve ekzistuese në 15 shoqëri rajonale. Aktualisht, porcesi nuk është përmbyllur tërësisht, pasi një sërë bashkish nuk kanë realizuar ende bashkimin, telsa për finalizimin e procesit nevojiten vendimet nga Këshillat Bashkiakë. Tirana dhe Shkodra janë 2 prej tyre.

Ola Mitre / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.