Ulje taksash për industrinë e gjelbër në Francë – Objektiv, reduktimi i emetimeve të gazeve serrë
Franca mund të ofrojë ulje taksash dhe subvencione për prodhimin e teknologjive miqësore me klimën në vend, sipas propozimeve nga ligjvënësve që po përgatisin një projektligj për industrinë e gjelbër.
Në përpjekje për të ulur sa më shumë emetimet e gazeve serrë, qeveria e Francës është e shqetësuar se kompanitë e saj mund të mbeten në mënyrë të pakthyeshme prapa rivalëve amerikanë, të nxitur nga Akti i Reduktimit të Inflacionit prej 430 miliardë dollarësh të administratës Biden.
Për të shmangur këtë, Ministri i Financave Bruno Le Maire ka ngarkuar një grup ligjvënësish dhe drejtues biznesi që të dalin me propozime për t’i mbajtur firmat franceze konkurruese dhe për të ndryshuar një prirje afatgjatë të çindustrializimit në vend.
Propozimet përfshinin plane për ulje taksash dhe subvencione në varësi të madhësisë së investimit të një kompanie ose sa prodhon ajo në Francë.
Masa mund të ofrohet si një pagesë paradhënie për të siguruar rrjedhjen e shpejtë të parave dhe do të synonte prodhuesit e baterive dhe metaleve kritike, elektrolizuesve, pompave të nxehtësisë, centraleve bërthamore të gjeneratës së ardhshme, gjeneratorëve fotovoltaikë dhe të erës, teknologjive të kapjes dhe ruajtjes së karbonit, gjysmëpërçuesve si dhe rrjetet e energjisë elektrike.
Le Maire theksoi se tani është koha për të gjetur financim dhe për të investuar dhe për këtë arsye paratë publike duhen vendosur në tryezë. Propozimet, që do i nënshtrohen një konsultimi publik përpara se legjislacioni të shkojë për miratim në parlament këtë verë, do të financohen duke reduktuar trajtimin e favorshëm tatimor në të cilin kanë akses aktualisht disa industri ndotëse.
Në veçanti, një ulje taksash për konsumin e karburantit, që aktualisht përfiton industria ajrore dhe transporti detar, por mund të reduktohet dhe taksa për modelet e automjeteve shumë ndotëse mund të rritet më tej. Ligjvënësit, drejtuesit e bizneseve dhe një zyrtar i ministrisë së financave thanë se shumat dhe qëllimi i saktë do të përcaktohen në muajt e ardhshëm kur të përgatitet projektligji.
Dorina Kurtaj / SCAN
Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.