Mësuesit në Britani refuzojnë ofertën e qeverisë – Sektori i arsimit, prej ditësh në grevë për paga më të larta
Mësuesit kanë refuzuar me shumicë dërrmuese një ofertë pagash nga qeveria britanike. Lajmi u konfirmua nga sindikata që tha se do të zhvillojë edhe dy ditë të tjera grevë. Sindikata Kombëtare e Arsimit, sindikata më e madhe arsimore në Britani, tha se 98% e mësuesve që votuan, ndoqën këshillën e saj për të refuzuar ofertën e një pagese një herë në këtë vit prej 1000 paund dhe një rritje mesatare të pagës prej 4.5% në vitin e ardhshëm financiar.
Në deklaratën e saj për mediat sindikata theksoi se ky refuzim i fuqishëm i ofertës së qeverisë nuk duhet të lërë asnjë dyshim për ministren e arsimit Gillian Keegan për t’u rikthyer në tryezën e negociatave me një propozim shumë më të mirë.
Dhjetëra mijëra mësues anembanë Britanisë janë bërë pjesë e grevave këtë vit në kërkim të një page të mjaftueshme për t’u përballur me inflacionin, duke i lënë klasat bosh dhe duke bërë presion mbi kryeministrin Rishi Sunak për të ndihmuar në zgjidhjen e mosmarrëveshjes. Sindikata tha se mësuesit do të ndërmarrin dy ditë të tjera grevë, më 27 prill dhe 2 maj.
Ministrja Keegan u shpreh e zhgënjyer për këtë vendim duke këmbëngulur se qeveria nuk do të negociojë më. Ajo sqaroi se paga tani do të vendoset nga organi i pavarur i rishikimit të pagave, i cili do të rekomandojë rritje të pagave për vitin e ardhshëm. Qeveria ka argumentuar se rritjet më të larta të pagave vetëm do të përkeqësonin inflacionin.
Mësuesit në Uells kanë përfunduar grevën e tyre pasi votuan për të pranuar një ofertë pagese që përfshin një çmim shtesë page 3% për 2022/23 së bashku me një pagesë 1.5% një herë, dhe një rritje prej 5% të financuar nga qeveria për vitin e ardhshëm. Sindikata më e madhe e mësuesve në Skoci ka pranuar gjithashtu një marrëveshje pagash për t’i dhënë fund grevave të gjata, për një rritje prej 14.6% të pagave për shumicën e mësuesve deri në janar 2024.
Dorina Kurtaj / SCAN
Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.